Аскер–патриот жырла айтып эришгендиле

  Кёп болмай Чегем шахарда «Жырлайыкъ, шуёхла» деген аты  бла аскер-патриот жыр айтыудан район аралы конкурс болгъанды.    Аны магъанасы жаш адамланы  патриот сезимлерин кючлерге,  тамата тёлю бла байламлыкъны  тас этмезге, къыралны   тарыхы  бла игиракъ  шагъырейлендирирге  эм  Уллу Ата журт урушну заманында айтылгъан  жырланы эсге тюшюрюргеди.   Бу жол анга   школланы барысындан да  16 къауум къатышханды.   

Программагъа кёре, окъуучула сахнада   жыр айтхандыла, назмула, прозала окъугъандыла,  урушха жораланнган  киноладан  кесекле кёргюзтгендиле эм   актёр  усталыкъларын да ачыкълагъандыла. Саулай айтханда, хар номерге да уллу къыйын салыннганы  сезилгенди. Ол себепден къараучуланы бюсюрегенлери да бетлеринден белгили эди.   Ахырында уа  жаш адамла тенглерине Уллу Хорламны келтиргенлени эм ол   не багъа берилгенин унутмазгъа чакъыргъандыла.