LTE связь тири айный барады

Бизни къыралда сотовый связь былтыр да бек тири айныгъанды. Роскомнадзорну КъМР-де Управлениясында айтханларына кёре, радиочастотный службаны специалистлери ол кезиуде РФ-де сотовый операторлада иеликде быллай связь бла жалчытхан оборудованиядан кёп къалмай 800 минги болгъанын тохташдыргъандыла. Жылны аллындан башлап аланы саны 13 процентге кёбейгенди. Бегирекда «Т2 Мобайл» ООО-ну сетьлерине къошулгъанды – 23 процент. Анда хайырланыуда аладан 176 минги барды.

«ВымпелКом» ПАО 174,4 мингин ишлетеди, кеси да аланы санын 16 процентге кёбейтгенди. «МегаФон» бла «МТС» компанияланы радиосетевой мюлклери алай тири айнымагъанлыкъгъа (+8 эм +9 процент), алада бирсиледен эсе аслам оборудование барды: 248,6 эм 195,6 мингишер.

Ведомствода белгилегенлерича, къошулгъан оборудованияны ючден бири LTE связьны жалчытады. Сотовый операторланы бары да аладан 327 мингин ишлетедиле.  Асламысын  Москвада эм Москва областьда, Санкт-Петербургда эмда Краснодар крайда хайырланадыла.