Жангы маршрутну хайыры - ишчи жерле бютюн терк айныу

Автомототуризмни битеумиллет ассоциациясыны президенти Сергей Лобарев билдиргеннге кёре, «Элбрусну таурухлары» деген автомобиль турист маршрутну къураргъа белгиленеди. Ол ал кезиуде Шимал Кавказны тёрт регионун – Къабарты-Малкъарны, Къарачай-Черкесни, Шимал Осетия-Аланияны бла Ставрополь крайны байларыкъды.

Жазда сагъынылгъан республикаланы биринде организацияны субъектледе келечилерини эм экспертлени къатышыулары бла регионла араны жыйылыуу боллукъду. 2020 жылгъа ишини планына кёре ассоциация беш халкъ маршрутну, ол санда «Элбрусну таурухларын» да сертификациясын бардырлыкъды, анда жолну хайырланыугъа хазырлылыгъы да тинтилликди. Экспертлени оюмларына кёре, Кавказда автомобиль туризмни айнытыргъа битеу онгла бардыла.

КъМР-ни курортла эм туризм министрини къуллугъун толтургъан Мурат Шогенцуков да маршрутну къурау а республиканы кёрюрге, мында солургъа сюйгенлени санын кёбейтиригин чертгенди.

Автомаршрутну хайырланыугъа бериу,  туристлени санын ёсдюргенден тышында, экономиканы айнытыугъа себеплик этерикди. Ассоциацияны регионда бёлюмюню башчысы, «Тау Россей» проектни башламчысы Байсыланы Темиржан айтханыча, бу проектни тамамлагъанда жангы ишчи жерле да къураллыкъдыла. Туристле бу маршрутну ариу табийгъатыбызны кёргенлеринден тышында, тынгылы сервиси ючюн да жаратырыкъдыла, дегенди ол.

Басмагъа Кульчаланы Зульфия хазырлагъанды.
Поделиться: