«Илмуну ыйыгъында» - КВН, «жолоучулукъла, миллет адет-тёреле

Республиканы школларында «Илмуну ыйыгъы» ётгенди. Тёреде болгъаныча, анга 1-11 классланы окъуучулары къатышадыла. Аллай сейир дерслени Яникойну орта школунда да бардыргъандыла.

Сёз ючюн, ингилиз тилден КВН 5-чи классдагъыланы арасында ётгенди. Аны устазла Байсолтанланы Лариса бла Трамланы Азиза хазырлагъандыла. Сабийле анга бек сюйюп къатышхандыла.

Малкъар тилден устаз Мурзаланы Тамара  уа «Тауладан бийик таулу адет» деген ачыкъ дерсни 8-чи классда бардыргъанды. Анда сабийле халкъыбызда жюрюген эрттегили тёрелени юслеринден къонакълагъа тынгылы хапар айтхандыла, берилген соруулагъа тюз жууапла бергендиле.

«Илмуну ыйыгъында» дагъыда географиядан дерс бардырылгъанды. Аны устаз Даббарлы Гультачин  ётдюргенди. Дерс а Австралиягъа жораланнган эди. Къыралны география бла байламлы энчиликлеринден сора да, окъуучула аны тарыхыны юсюнден, регионну энчилиги неде болгъанын да ачыкълагъандыла.