Чексиз шуёхлукъ

«Бирге насыплыбыз» регион адабият араны алчылары интур-отель «Синдикада» «Чексиз шуёхлукъ» проектни чеклеринде «Души прекрасные порывы» аты бла музыкалы-адабият ингир бардыргъандыла. Анга Чечен Республиканы Жазыучуларыны союзуну келечилери Усман Эльмурзаев, Асланбек Тугузов эм Руслан Юсупов чакъырылгъандыла. Аладан сора да, тюбешиуге республикабызны чыгъармачылыкъ интеллигенциясыны келечилери да келгендиле. Тюбешиуню Алёна Чернова бардыргъанды.

Республиканы Жазыучуларыны союзуну правленини председатели, КъМР-ни халкъ поэти  Беппайланы Муталип къонакъланы поэзиясы бла энтта да бир кере шагъырейленирге онг чыкъгъанына жюрек ыразылыгъын билдиргенди. Андан сора да, быллай адабият ингирле келир заманда терк-терк бардырыла турлукъларына эмда экимиллетни поэтлерини араларында чынтты шуёхлукъ къураллыгъына толу ийнаннганын айтханды.

«Синдика» интур-отельни толтуруучу директору Руслан Кешоков КъМР-ни халкъ поэти Алим Кешковну назмусун окъуп тюбегенди къонакълагъа эмда эки миллетни поэзияларыны бир бирге ушагъан шартларыны юлгюлерини юсюнден сёлешгенди. Быллай тюбешиуле энчи магъананы тутханларын белгилеп, къонакълагъа ыразылыгъын билдиргенди.

«Бирге насыплыбыз» маданият араны таматасы Вера Дохова адабият ингир эки миллетни культура байламлыкълары къурауда магъаналы атлам болгъанын айтханды.

-  Мен бу биригиуню къурагъанлы эм анга башчылыкъ этгенли юч жыл толгъанды. Бизни борчубуз Къабарты-Малкъарны эм иги тёрелерин сакъларгъады эмда ёсе келген тёлюню алагъа юйретиргеди. Шимал Кавказны халкъларыны адет-тёрелерин билген жаш тёлю келир заманда миллетле араларында шуёхлукъну жюрютюрюкдю. Аны себепли бюгюнча адабият ингирле алагъа юлгю болургъа керекдиле, - дегенди Вера Дохова.

Дагъыда Кавказны миллетлерини араларында ёмюрле бла жюрюген шуёхлукъну юсюнден КъМР-ни сыйлы артисткасы Къулийланы Элизат, КъМР-ни Къырал саугъасыны лауреаты, режиссёр Руслан Тхагазитов, жазыучу Амир Макоев, «Сябры» жамауат биригиуню башчысы Павел Сидорук хапарлагъандыла. Элизат а Чеченден келген къонакълагъа китапласаугъалагъанды. Ызы бла жыйылгъанлагъа концерт кёргюзтюлгенди.

Руслан Юсюпов, тюбешиуню ахырында сёз айта, адабият ингирни къурагъанлагъа, аны бардыргъанлагъа, тюбешиуге келгенлеге жюрек ыразылыгъын билдирип, чечен поэтлени  назму жыйымдыкъларын саугъагъа бергенди эмда бизни поэтлени кеслерини республикаларында бардырыллыкъ адабият байрамгъа чакъыргъанды.