Эсгериулени къозгъагъан, кёлню да кётюрген тюбешиу

Уллу Ата журт уруш кёплени сабийликлерин сыйыргъанды. Жашчыкълагъа бла къызчыкълагъа заводлада, сабанлада урунургъа тюшгенди. Каскулов Къаральби къазауатны ачы кюнлерин гитчелей сынагьанладан бири болгъанды. Бу кюнледе Бахсан шахарны 3-чю прогимназиясыны окъуучулары Ата журтну къоруулаучуну кюнюню аллында аны жокълагъандыла.

Уруш башланнганда Къаральби Талибовичге 9 жыл толгъан эди, алай, сабий кёргенин унутмаз дегенлей, ол къыйын кезиулени эсинде тутады.
Каскуловланы шуёх юйюрлерин Исламейде билмеген, анга хурмет этмеген жокъду. Юйюр башчы къазауат жыллада, тиширыула бла сабийле фронтха кетген абаданланы алышындыргъанларында, ишлеп башлагьанды. Анга буюрулгъан жумушну киши тырман этмезча толтургъанды.

Урушдан сора уа тозурагъан мюлкню аягъы юсюне салыргъа тири къатышханды. Кёп заманны водитель болуп тургъанды эмда кесини ишине жууаплы кёзден къарагъанды. Аны аты жаланда махтау бла айтылгъанды.

Къаральби Талибович юй бийчеси Женя Адиловна бла сегиз сабий ёсдюргендиле. Ала иш кёллюледиле, тюз ниетлидиле, адеплидиле. Кеслери да ариу юйюрле къурагъандыла. Жарсыугъа, акъсакъалгъа бушуу сынаргъа да тюшгенди - ол бир ненча жыл мындан алгъа юй бийчесин бла эки къызын асырагъанды. Болсада туудукъла бла аладан туугъанла (ала уа къыркъдан артыкъ боладыла) аппаны къууандыргъанлай турадыла.

Окъуучула бла тюбешиуню кезиуюнде Къаральби Талибович уруш жылланы юслеринден хапарлагъанды, аланы сорууларына да жууапла бергенди.