Жаш тёлюню чыгъармачылыкъгъа талпындыра

Къабарты-Малкъар къырал университетде тёрели ачыкъ олимпиадаланы чеклеринде орус тилден «Любослов» деген ат бла  бардырылгъаннга бу кюнледе 200 адам къатышханды. Эсгерте кетейик, ол тамата класслагъа  деп жарашдырылгъанды.

Филология илмуланы доктору, профессор Геляланы  Ариука чертгеннге кёре, аны мураты жаш тёлюню бу предметге сейирин къозгъауду эмда чыгъармачылыкъгъа итиндириудю. Аны бла бирге уа школчуланы логикалы оюм эте билиулерин, кёз къарамларын эмда хунерлерин айнытыуду, сагъынылгъан предмет илмуну бир уллу бёлюмю болгъанын ангылатыуду.

Эки сагъатны ичинде сабийлеге он ишни тамамларгъа керек эди. Аланы санында уа тил билимден (хар бёлюмюнден), орус тилни тарыхындан да соруула болгъандыла. Аланы къыйынлыкълары уа жаланда мектепни программасы бла чекленип къалмагъанды. Окъуучула  кеслерини интеллектуал, эрудиция даражаларын да  ачыкъларгъа керек эдиле. Сёз ючюн, ала «Ставрополь, Волгоград, Оренбург, Новгород деген сёзлени къалай къуралгъанларын, жарашдырылгъанларын (этимологияларын) ангылатыгъыз. Аланы (сёзлени) экинчи тамырлары къайсы тилден алыннгандыла эмда аланы магъаналары неди?» дегенча  соруулагъа да жууапла бергендиле.

Барыбыз да билебиз, орус тил сабийле школну тауусханда борчлу халда берилген ЕГЭ-леден бириди. Аны ючюн а ала кеслерини билим даражаларын сынай тургъанлары кесини  себеплигин бермей къаллыкъ тюйюлдю.

Ол жаны бла уа олимпиада формат контроль этиуню эм къатысына, къыйынына саналады. Нек дегенде, белгилегенибизча, алада огъарыда сагъынылгъанча сакъланмагъан, сунмагъан соруула да чыгъып къаладыла.

Быллай тюбешиулени дагъыда бир игиликлери, хайырлары – КъМКъУ-ну башламчылыгъы бла бардырылгъан олимпиадалада эмда конкурслада хорлагъанла бла аланы призёрлары бу вузгъа окъургъа  кирирге сюйселе, Бир къырал экзаменде алгъан балларыны юсюне дагъыда беш балл къошулады (олимпиадада белгиленнгенлери ючюн). Ангылата кетейик, ол балла жаланда кесибизни университетибизде студент болургъа излегенлеге бериледиле. Жангызда республикада угъай, къырал даражада бардырылгъан олимпиадаланы да, алада белгиленнгенлеге деп, кеслерини энчи себепликлери бардыла.

Алай бла онунчу класслагъа жюрюгенлени арасында Нальчикни мектеплерини келечилери айырмалы болгъандыла – Карина Куготова (1-чи жер); Улбашланы Алина (14-чю номерли гимназия, экинчи жер); Аслан Диданов да экинчи оруннга тийишли болгъанды. Ючюнчюге уа Бахсан райондан Милана Березгова чыкъгъанды.

Онбиринчиде окъугъанладан а бу жол биринчи жерни алгъанла жокъдула. Экинчиге ара шахарыбыздан – Элина Гучапшева бла Милена Шалова тийишли болгъандыла. Бахсан райондан Кристина Скорикова уа ючюнчю даражагъа чыкъгъанды.