Саулукъ сакълауну дерслери

ФСИН-ни  КъМР-да Управлениясыны 5-чи номерли  колониясында тургъан тиширыула бла юйретиу-ангылатыу иш бардырылгъанды. Ол  жыйырма биринчи ёмюрню бек къыйын эмда къоркъуулу аурууларындан бирине –ракгъа -  къажау битеудуния кюннге жораланнганды, деп билдиргендиле УФСИН-ни пресс-службасындан.

Колонияны тамата психологу тиширыулагъа ол ауруудан кесин къалай сакъларгъа, аны эрттерекден окъуна къалай бла билирге боллугъуну юсюнден да айтханды. Тиширыула ёшюнлерине жылгъа эки кере  диагностика этдире турургъа тийишлисин да чертгенди.

Аллай тюбешиу 1-чи номерли  СИЗО-да   бардырылгъанды. Учрежденияны психология лабораториясыны начальниги  Бёзюланы Заира анда тургъанлагъа  рак аурууну юсюнден кёп  хапар айтханды. Анга тынгылагъанладан экиси  ауруп сау болгъанларыны юсюнден билдиргендиле. Андан сора  жашауларындан хапар айтхандыла. Тюбешиуню ахырында анга къатышханланы барына да ракгъа къажау кюреш бардырыуну белгисича  къызгъылдым журунчукъла юлешиннгендиле.

Холаланы Марзият.
Поделиться: