Студентле наркотиклеге къажаудула

Кёп болмай Информация технологияла эм экономика колледжде врач-наркологла бла  ич ишлени органларыны келечилери  студентлеге  «Жаш адамла наркотиклеге къажаудула» деген темагъа жоралап «тёгерек стол» бардыргъандыла.

Жыйылыу  «Наркотикле. Алдауну тасхалары» деген видеороликге къараудан башланнганды.  Анда наркотикле сатханла хыйла бла  адамны тюз жолдан тайдыргъанларыны,  ызы бла ала да танышларын    аман къылыкъгъа юйретгенлерини юсюнден айтылгъанды. Наркология диспансерни  психологу Залина Кушхова бир-бир жаш адамла наркотиклеге  жашауда  кеслерин табалмагъанларыны, бир тюрлю таукеллик излегенлерини     сылтауундан  тюзелгенлерин  айтханды.

- Мен ишим бла байламлы   кёп жарсырча шарт кёреме. Аладан эм башы -  адам сыфатын тас эте баргъаныды. Аны сау  этип къоярча амал а жокъду.   Хар ким жолун кеси сайлайды, биреуленнге узакъ ёмюр, башхасына уа иги да къысха жашау жетеди,- дейди врач-нарколог Артур Пачев.  

Медицина консультация-диагностика араны  психиатр-наркологу  Анзор Лобжанидзе да наркотиклени хатасындан жаш адамла  къыйналып  ёлгенлерин, аладан туугъан сабийледе уа   тюрлю-тюрлю кемчиликле табылгъанларын да  билдиргенди.

Наркотиклени асырагъан эмда  сатхан адам къаллай жууапха тартылыргъа боллугъуну юсюнден  а наркотиклени жюрютюрлерине   къажау   бёлюмню толу эркинликли опери  Бечелланы Ислам хапарлагъанды.  Аны бла бирге, ол  наркоманны жалан  эки жол сакълагъанын да эсгертгенди –  тутмакъ неда ёлюм.

- Наркоман - юйюрню палахыды.  Жашларын тутмакъгъа олтуртурча бирде ата-анала кеслери тилейдиле. Аланы арасында саулукълары бузулуп чыкъгъанла да  аз тюйюлдюле. Андан сора да, аллайны киши ишге алыргъа да сюймейди, - дейди КъМР-да  УФСИН-ни  таматасыны  орунбасары Залина Куважукова.  

Дзюдодан спортну устасы, халкъла аралы  даражалы   судья Светлана Березгова уа, аманлыкъладан кери турурча  жаш адамланы спорт бла кюреширге чакъыргъанды.  
Жыйылыуда студентле, къонакъла кёп тюрлю соруула берип, алагъа толу жууапла да алгъандыла.   Ахырында уа  жаш адамла   барысы да бирден  наркотиклеге къажау болургъа сёз бергендиле.