Эм иги проектге - жюз миллиондан аслам сом

Быйыл Чегем районну администрациясы  Россейни Къурулуш министерствосу бардыргъан «Гитче шахарла бла эллени болумларын игилендириу» деген битеуроссей конкурсха къатышырча заявка бергенди, деп билдириледи муниципалитетни администрациясыны пресс-службасындан.

Алай бла Чегем  шахар хорласа,  федерал бюджетден  62 миллион сом эм республикадан да 42     миллион сом берилликди, анга   энчи  иелиле да къошарыкъдыла. Проектни чеклеринде Бахсан шоссени 2,4  километр чакълы  узунлугъунда    неда  13, 3 гектар жерде тематикалы  майданла,  жаяу жюрюгенлеге, аякъ машиналада   учханлагъа тротуарла ишленирикдиле, тёгерек-баш  жашиллендирилликди, кече жарыкъ болурча мадар этилликди эм башха жумушла да тамамланыллыкъдыла.  

- Бизге  проектни жарашдырыргъа  Ярославльден «Ярус» фирма болушханды. Ол аты кенг белгили, сынамлы фирмады.   Алгъаракъда аны себеплиги  бла бахсанчыла конкурсда 85 миллион сом  хорлагъандыла. Мындан арысында да   ала бла   байламлыкъда ишлерге муратыбыз барды. Эм биринчи   Чегем чучхарлада турист-рекреация комплексни  игилендирирча  проектни   хазырларыкъбыз, - дейди Чегем районну администрациясыны башчысы Юра  Борсов.

«Ярус» къауумну таматасы  Егор Збаранский а  Шимал Кавказда ала бла иги шагъырей болгъанларын, озгъан жыллада фирма   беш  шахаргъа  345 миллион сом багъасына жетишимли проектле  хазырларгъа болушханын  да айтханды. Жер-жерли власть органланы да ачыкъ кёллюлюклерин ыспас этип,  мындан арысында да   къошумчулукъ этерге хазырлыкъларын  чертгенди.

Бюгюнлюкле конкурс техника  экспертизаны жетишимли ётгенди.   Конкурсну эсеплери уа биринчи мартда белгили боллукъдула.

Магометланы Сулейман.
Поделиться: