Гитче предпринимательствогъа – банкны къошумчулугъу

Россельхозбанкны Къабарты-Малкъарда бёлюмю гитче эмда орта бизнес бла кюрешгенлеге былтыр кредитледен 830 миллион сом бергенди. Буруннгу жыл бла тенглешдиргенде, ол 1,7 кереге кёпдю, деп билдиргендиле финанс учреждениядан. Ахча инвестиция проектлени тамамлаугъа, техника сатып алыугъа, кезиулю сабан ишлени тындырыугъа эмда башха жумушлагъа къоратылгъанды.

Банкны быллай хайырланыучула бла ишлеген бёлюмюню таматасы Залим Алоков айтханнга кёре, гитче эмда орта бизнес бла байламлыкълагъа ала не заманда да бийик магъана бередиле. Алагъа деп жыйырмадан аслам кредит программа жарашдырылгъанды. Аны себепли ахчаны производствону къайсы сферасында да хайырланыргъа, андан тышында бизнесни айнытыугъа да жиберирге боллукъду, деп чертгенди ол.