Жерлени сугъарыугъа – аслам эс

Быйыл Къабарты-Малкъарда эл мюлк жерлени сугъарыугъа жарым миллиард сом чакълы къоратыллыкъды. Белгилисича бизни регионда жерчилик  артыкъ уллу файда келтирлик сферагъа саналмайды. Аны себепли РФ-ни Эл мюлк министерствосу мелиорацияны хайыры бла къыралны экспорт онгларын кючлендирир умутда сынам регионнга Къабарты-Малкъарны сайлагъанды.

Алай бла, республиканы Правительствосу бла этилген келишимге тийишлиликде, быйыл эл мюлк жерлени сугъарыугъа ахча болушлукъ берилликди: «Россейни мелиорация комплексин айнытыу» программаны чеклеринде – 148,8, «Агропромышленность комплексни продукциясыны экспорту» деген федерал программа бла уа 349 миллион сом.

Бу сферада быйылгъа дери да аслам мадар этилгенди, деп белгилегендиле КъМР-ни Эл мюлк министерствосунда. Сёз ючюн, былтыр сагъынылгъан эки программаны хайыры бла тийишли жумушлагъа 424,5 миллион сом къоратылгъанды. Ол ахчагъа тогъуз минг гектардан артыкъ жерде сугъарыу системала жангыртылгъандыла эмда гидротехника объектле ишленнгендиле.