Бет жарыкълы къайтхандыла

Бахсан районну Жанхотия элинде «Джигит» тепсеу ансамбль къуралгъанлы жаланда эки жыл толгъанды. Алай  эсе да, ол кесини хунерин къуру республикабызда угъай, андан тышында да ачыкъларгъа, кёргюзтюрге жетишгенди.

Элни Маданият юйюнде бардырылгъан тепсеу юйретиулеге бюгюнлюкде  алтмышдан аслам жашчыкъ бла къызчыкъ жюрюйдюле (бешжыллыкъладан башлап онжетижыллыкълагъа дери). Алагъа башчылыкъны уа Мухамет Шогенцуков этеди. Бери сабийле дагъыда Кёнделенден, Лашкутадан да келедиле.

Айтханыбызча, коллектив къуралгъанлы кёп озмагъан  эсе да, ол айырмалыланы санында болгъанлай келеди. Эм алгъа ала Ставропольгъа баргъандыла. Анда, фестивальгъа къатышып, биринчи жерни алгъандыла. Ызы бла уа Минеральные Воды шахарны къонакълары болгъандыла. Анда да, биринчиликни ычхындырмай, эллилерин къууандыргъандыла.

Алгъаракълада  уа ансамбль Москвада Миллет культураланы эмда  фольклорну бешинчи халкъла аралы конкурс-фестивалындан къайтханды. Къыралыбызны ара шахарына онбеш сабий баргъанды. Ары юч  номерлерин элтгендиле. Алай бла,  номинацияларына тийишлиликде тепсеп, дауурбас бла да  юч биринчи жерни алгъандыла. Уллу концерт а Измайловский деген залда болгъанды. Сабийле юч кюнню ичинде бирси халкъланы да хореографиялары бла шагъырейленирге онг тапхандыла.

Сагъынылгъан конкурс-фестиваль «Душа народа моего» деген ат бла озгъанды Аны «Радость планеты» чыгъармачылыкъ жамауат биригиу къурагъанды. Жууукъ-ахлула, устазла, барысы да бизни сабийлени сахнагъа чыгъар эмда эсеплери белгили болур кюнню сагъайып сакълагъандыла.

Алай эсе да, жаш тепсеучюлерибиз, аланы ышанмакълыкъларын алдамай,  ёхтемленирча, къууанырча  этгендиле. Аны себепли эллиле хорлам бла къайтхан жашлагъа  бла къызлагъа  Нальчикде темир жол вокзалда той-оюн бла тюбегендиле.

Айхай да, къайда да ёсюп  келген  тёлюбюз биринчи болса, барыбызны да кёлюбюз кётюрюледи. Алагъа болушлугъун аямагъан Маданият юйню таматасы Заурби Кушховха да ансамбльге жюрюгенле ыспас этедиле.

Хунерли тепсеучюлеге костюмланы тикген, аланы  жол хакъ бла жалчытхан да ата-аналадыла. Алай эсе да, сабийлени жетишимлерине  ыразыдыла, солуу заманларын  бошуна оздурмай, жюреклери жаратхан жумуш бла кюреше эселе, аланы санындан тин хазнабызны сакъларгъа къыйын саллыкъла да чыгъарла деп ийнанадыла.

Коллектив мындан арысында да эришиулеге къатышыр, жетишимли да болур муратлыды. Энди  уа беш-сегизжыллыкъчыкъла бла ариу тепсеуле салып, ала бла да республикадан тышына чыгъар акъылдадыла.