Муслийманны къолундан, тилинден да бир адам да ачымазгъа керекди

Мухаммад файгъамбар, Аллахны саламы анга болсун: «Муслийманны  къолундан, тилинден да бир адам да ачымазгъа керекди»,-дегенди.

Абу Хурайраны сёзлеринден билдиредиле. Бир жол эр киши Абу Бакргъа дау этип, анга урушуп башлагъанды. Файгъамбар алагъа ышарып къарап тургъанды, ачыуланнган эр кишини къыза баргъанына сейир эте. Алай ол ачыдан-ачы тюйюше башлагъанда, Абу Бакр аны бир-бир сёзлерине жууап бергенди. Ол кезиуде уа Мухаммад, ачыуланып, алайдан кетип башлагъанды.

Асхабы аны жетип: «Файгъамбар, ол манга къычыргъанда, сен ышарып олтургъанса. Алай мен аны бир-бир сёзлерине жууап бергенимде уа, чамланнган этгенсе»,-дегенди.

- Сен тынгылагъан кезиуде ол эр кишиге жууапны мёлекле бергендиле. Алай сёз къайтаргъанынгда уа, шайтан келгенди. Мен а шайтан бла бирге олтурмайма,-дегенди анга Мухаммад, Аллахны саламы анга болсун.

Ызы бла ол Абу Бакрны юч кертиликге юйретгенди. Биринчиден, Аллахны къулуна тюзсюзлюк этилгенине да къарамай, ол аны ачытханны Аллах ючюн кечсе, артда бизни Жаратхан аны сыйын бийиклеге кётюрлюкдю.

Экинчиден, адам жууукъ байламлыкъланы кючлер мурат бла жандауурлукъну жолуна турса, Аллах аны байлыгъын андан да кёбейтир. Ючюнчюден а, биреулен кесини къолайлыгъын игилендирир мурат бла адамладан болушлукъ тилесе, Аллах анга факъыралыкъдан башха бермез. (Ахмад, аль-Байхакъи, ат-Табарани).