Хайырындан эсе хатасы уллу болгъан метанол

Къыш сууукълада водительлеге машиналарына мияланы жууучу сууну сайлауну къайгъысын этерге тюшеди. Ол бузлап къалмаз ючюн анга кёп химия затла къошуп  жарашдырадыла. Алай ала водительни саулугъуна хата салыргъа боллугъун а тергеймидиле? Бу соруугъа Роспотребнадзорну Къабарты-Малкъарда управлениясыны специалистлери жууап бередиле.

Аланы  айтханларына кёре, аллай сууланы  законсуз  чыгъарыучула асламысында аны метил спирт къошуп  жарашдырадыла.  Ол  мияланы  бузламазына себеплик этеди, алай бек къоркъуулу уугъа саналады. Да сора аны нек къошадыла десегиз а – ол этил неда башха спиртледен эсе иги да учузду.

Метанолну жаланда бир чай къашыгъы адамны сокъур этерге боллукъду. Ол нервалагъа, ёпкелеге да  хата  салады. Андан къаннга жаланда жюз миллилитр, бир-бирледе уа андан да аз тюшгени уа, адамны жашаууна окъуна къоркъуулуду.

Аны бла ууланыу, биринчиден, аз-маз эсиртгенча алай белгили болады. Ызы бла адамны кёлю аман этеди, башы ауруп башлайды, кёзлери  амандан -аман кёрюп тебирейдиле.  Артда уа  адамны териси кёксюлдюм болуп, солууу да тыйылып башлайды. Ууланыу теренине кетсе уа, адам тунчугъуп ёледи.

Россей Федерацияда метанолну автотранспортха керекли затлада хайырланыугъа, ол къошулуп жарашдырылгъан затланы адамлагъа сатыугъа баш санитар врачны 2007 жылда 47-чи номерли буйругъу бла чек салыныпды, ол эсигизде болсун.

Мияла  жууучуну  уа жаланда белгили жерледе сатып алыргъа кюрешигиз, кимден болса алмагъыз. Дагъыда шешаны юсюндеги къагъытда не зат жазылгъанына эс буругъуз: ол къайда чыгъарылгъанына, предприятияны атына, тургъан жерине, продукцияны къурамына, ол къаллай мардалагъа  келишгенине, хайырланыргъа жараулу болжалына эмда къоркъуусузлукъ жаны бла излемлерине. Быллай продукцияны жол жанларында законсуз  сатылгъанын  неда шешалада  сагъынылгъан шартланы толусунлай басмаланмагъанларын эслесегиз а, аны юсюнден Роспотребнадзоргъа билдиригиз.