Кемчиликлени къысха заманда кетерирге буюрулгъанды

Кёп болмай Май муниципал районда быйыл  халкъны санын жазыуну битеуроссей акциягъа хазырланыу бла байламлы  ишчи комиссия ючюнчю кере жыйылгъанды. Аны ишине жер-жерли администрацияны башчысыны орунбасары Бездудная Ольга, Шимал Кавказстатны таматасыны орунбасары  Аурика Гаштова,  къырал статистика бёлюмню таматасыны орунбасары Марианна Маламусова, муниципалитетде  къурау комитетни  таматасы Шлык Юрий,  эллени таматалары эм башхала къатышхандыла.

Жыйылыуну ача, Ольга Бездудная бу магъаналы иш тийишлисича ётдюрюлюр ючюн  озгъан жыл не   этилгенини  юсюнден хапарлагъанды. Аурика Гаштова да жер-жерли самоуправленияны келечилерине салыннган борчну юсюнден  билдиргенди. Ол санда–юйлени, фатарланы номерлери, орамланы атлары  алгъын жазылгъанларына келишгенлерине бла къалгъанларына     эс бурургъа  кереклисин чертгенди. Юрий Шлык бу жаны бла   кемчиликлени кетериуню эсеплери бла шагъырейлендиргенди.  Эллени таматалары да   хазырлыкъларын билдиргендиле.

Тюбешиуню ахырында этилген эсгертиуле да тергелип,  комиссия Май районда  халкъны санын жазыу бла байламлы жумушланы  планын къабыл кёргенди. Аны бла бирге жууаплы органлагъа не ууакъ иш да тамамланмай  къалмазча  этерге  буюрулгъанды.