Айырмалылагъа – саугъала, сыйлы белгиле

    Алгъаракъда  Къабарты-Малкъарны Къырал эм муниципал жумушланы тамамлагъан  кёп  функциялы арасыны таматасы Аслан Афаунов МФЦ-ны «Новая высота» деген конкурсну республикада кесегинде хорлагъан келечилери бла тюбешгенди.
   Ол эришиуню   финалына чыкъгъанланы санында Арада уруннганла бирсиледен эсе аслам болгъандыла. Ол шарт  мында уста ишчилени эм оноучу кадрланы  тынгылы хазырлагъанларын ачыкълайды. Алай бла, биринчи жерлеге  Зезаланы Рамазан, Хучиналаны Индира, Хаирланы Лейла, Мадина Карданова эм Инна Шопагова чыкъгъандыла.
   Ачыкъ ушакъны кезиуюнде жаш адамла конкурсну юсюнден оюмларын билдиргендиле, Кёп функциялы араны эмда саулай республиканы айнытыу  проблемаларын да сюзгендиле.  Ала жарашдыргъан проектле бу жаны бла  ахшы къошумчулукъ этерине  ышаннганларын да айтхандыла.
   Аслан Амирович аланы ишлери бла байламлы къаллай муратлары болгъанын да соргъанды. Ахырында уа  конкурсантлагъа   Араны «Мои документы» деген белгиси  бла эсде къалырча саугъала бергенди эм мындан арысында да жамауатха хайырлы ишлеринде жетишимле тежегенди.
.