Эски батарейкаланы атмагъыз, ала къудуретге хаталыдыла

Къабарты-Малкъарда «Эко-Гармония» жамауат организация «Батарейки, сдавайтесь!» деген акцияны дайым бардыргъанлай турады. Бу ишни чеклеринде электротоварла сатыу бла кюрешген тюкенледе, билим бериу эмда багъыу учреждениялада эски батарейкаланы жыйгъан пунктла къурайдыла. Анга тюкенле кеслери да себеплик этерге боллукъдула. Жыйылгъан батарейкаланы уа Нальчикде Чернышевский орамда 51номерли  юйде «АНТИРТУТНЫЙ ЦЕНТР» обществогъа элтип берирге керекди, дейдиле бу организацияда.

Быллай эски затланы башха кир-кипчик бла атып къояргъа жарамайды. Алада эмда энергияны аягъан чыракълада кадмий, свинец, ртуть, литий дегенча уулу затла болгъанлары ючюн экологиягъа бек уллу заран тюшеди. Специалистлени оюмларына кёре, бир гитче батарейка 20 квадрат метр жерни халин бузады.

Кёп къыраллада бу проблемагъа тынгылы эс бурулады. Быллай затланы жангыдан жарашдырыуну алада жашагъанла да дурус кёредиле. Аны хайырындан экологиягъа салыннган заранны кетерирге эмда аладан темир эм графит алыргъа да болады.

Омарланы Мурат.
Поделиться: