Къайда да жууаплылыкъны сезиу, низамлыгъы, тизгинлилиги бла да атын айтдыргъанды

Уллу Хорламны 75-жыллыгъына

Герпегежден Созайланы Исмайылны жашы Мыртай  устазланы хазырлагъан рабфактда окъуй тургъанлай чакъырылгъан эди аскерге.  Алгъа ол Ровно областьда сапёрланы курсларындан ётгенди. Уллу Ата журт урушха да ма мында тюбегенди. 
 

Къазауатны биринчи кюнюнде окъуна душманны самолётлары, бомбала атып,  ол къуллукъ этген аскер бёлюмню жер бла тенг этгендиле. Алайда кёпле къырылгъандыла. Мыртайны батальону аманны кебинден Павловск шахаргъа жыйылгъанды. Алай бла Созай улу Волга черекни жагъасына тюшгенди. Былайда уллу сермешлеге къатышханды. Бу эр жюрекли солдатны къарыууна, батырлыгъына да нёгерлери сейир-тамаша болгъандыла.

 Украинаны азатлар ючюн къызыу сермешле баргъан заманда уа Созайланы Мыртай 283-чю жаяу аскер дивизияда миномётда наводчик эди. Никополь-Криворожск операцияда аягъындан ауур жаралы болуп, госпитальда кёп заманны жатханды. Андан чыкъгъандан сора аны полковой школгъа окъургъа жибергендиле. 
 

 Аны бошагъанлай, жерлешибизни 4-чю Къобан атлы аскер корпусха жибередиле. Ол анда 36-чы гвардиялы атлы аскер полкда миномётчик болуп урушханды. 
   

Мыртай Белоруссияны азатларгъа да къатышханды. Анда бир ауукъ заманны уруш этгенден сора 2-чи Украина фронтха жибергендиле. Къызыу сермешлени биринде ол, башына окъ тийип, дагъыда госпитальгъа тюшгенди. 1944 жылда, андан иги болуп чыкъгъандан сора, 203-чю жаяу аскер дивизияны къауумунда урушханды.  

   Ол кезиуде аскер бёлюмге, Венгрияны бла Чехословакияны чеклеринден ётюп, чабыууллукъну Карпат тауладан башларгъа деген буйрукъ келгенди.  «Душман, алгъадан окъуна алайда бегинип, бизни аскерлени алгъа барырларына чырмаулукъ этгенди. Бизни аскер бёлюмле ётерик жерле, миналадан толуп, шинжили темир чыбыкъла тартылып, атлар онг болмай къалады. Тёбе башында бизни жаныбызгъа окъ жауун жаудургъан пулемёт баш кётюрюрге къоймайды. Ол заманда полкну командованиясындан пулемётну жокъ этерге буйрукъ келеди. Биз аны толтурабыз»,-деп эсгергенди Созайланы Мыртай.
   

Ол сермешде этген жигитлиги эм батырлыгъы ючюн герпегежчи жаш «За отвагу» деген майдал бла саугъаланнганды. Аны уруш жоллары Чехословакиягъа дери келтиргендиле. Грон черекден ёте туруп эмда Годонин шахаргъа кирген заманда да Созай улуну миномёт расчёту айырмалы болгъанды. 
Сержант Созайланы Мыртай юйюне 1946 жылда къайтханды. Туугъан элинде алгъа усталыкъ этгенди, андан сора уа «Шуёхлукъ» колхозда баш бухгалтер болуп ишлегенди. Хар къалайда да атын низамлыгъы, жууаплылыкъны сезиу, тизгинлилиги бла да атын айтдыргъанды.  Ол Уллу Хорламны 60-жыллыгъына жеталмай ёлгенди, жаннетли болсун.