Башы агъарса да, адамны жюреги къартаймайды

Районлада реабилитация аралада таулула бек аздыла. Бизни республикада абаданла тургъан къырал юйледе хазна таулула болмайдыла. Алай шёндю больницада багъылыргъа сюйгенле  айла бла сакълайдыла. Бир ай реабилитация арада тургъан абадан а толусунлай саулугъун да тинтдирип, кереклисича багъылып, анга къошакъгъа солугъан да этип чыгъарыкъды. Реабилитация ара ол Абаданланы юйю тюйюлдю. Аны багъыу амалларын толусунлай хайырланыргъа керекди. 

Хау, башха миллетлени адамлары: «Сизде къартны бир жанына тюртген тёре жокъду, бир биригизни атмайсыз»,-деп, бийик багъа бередиле таулулагъа. Къартлагъа бла сабийлеге сый-хурмет этген, ариу кёрген - таулуланы культураларыны ёзегиди. Бизде не заманда да эм къарыусузлагъа аслам эс бурулгъанды. Алай шёндю къыралны жанындан да  абаданлагъа  кёп болушлукъ этилинеди. 

Сёз ючюн, Къашхатауда Батчаланы Миналдан башчылыкъ этген Абаданланы юйюнде таматала эки ыйыкъны ичинде багъылгъан да, солугъан да этип кетедиле. Къартлагъа аллай болушлукъ бек керекди. Абаданланы юйюнде аппала бла ыннала аш бла толусунлай жалчытылынадыла. Ары артистле  келип, концертле кёргюзтедиле.  Ол къартланы бек къууандырады, нек дегенде тау элледе, алгъынча, Культура юйледе  битеу жамауат жыйылыучу байрамла жокъну чегиндедиле. 

Дагъыда Къашхатауда реабилитация арада багъылгъан, солугъан абаданланы Чирик кёлге, Чегем чучхурлагъа эм башха ариу жерлеге элтедиле.  Битеу ёмюрлерин мында жашагъанлыкъгъа, ол жерлени биринчи кере кёргенле кёпдюле. Къартлыкъ къыйынлыкъ тюйюлдю, чачы агъаргъанлыкъгъа, адамны жаны жашлай къалады, ол ариу жырлагъа тынгыларгъа, тамаша жерлени кёрюрге, хант столлада тынч олтуруп,  ушакъла бардырыргъа излегенлей турады. Жаны сау жашаргъа сюеди! Аны себепли бу реабилитация арала берген онгла бла хайырланыргъа керекди.

Нальчикде Фурманов атлы орамда да барды быллай  юй. Къарачай-малкъар жаш тёлюню айныууна себеплик этген «Эльбрусоид» фонд  ол  юйге концерт программа эм тюрлю-тюрлю ашла бла баргъанлай турады. Къонакъла келген кюн акъсакъалланы бетлери жарыйды.  Абаданлданы бир къаууму ушакъ нёгер тапмай къыйналадыла. Адам жарлылыкъдан уллу жарлылыкъ жокъду дунияда. 

Шёндю битеу таулу элледен чыкъгъан предпринимательле къартларыбызгъа эс бурадыла. Машокла бла ун, бал туз, пиринч аладыла. Школчула келип, бахчаларында ишлейдиле. Таулуланы бек иги тёрелеринден бири таша жандаруурлукъду. Ингирде, жаланда кюн къарангы бет алгъандан сора, элтедиле садакъа болушлукъ керекли адамгъа. Болсада ачыкъ айтыргъа керекди: бусагъатда къыйналгъан таматала бизде да бардыла. Аланы жунчутхан ичгичи эм наркоман сабийлеридиле. Эл администрацияла аллай юйюрле бла ишлерге кюрешедиле, алай багъылмагъан аурууладан къыйналгъан, бузулгъан адамгъа атанга-ананга къара дегенден не файда? 

Ким жарытырыкъды аппаланы бла ынналаны жюреклерин? Жаланда сабийлери бла туудукълары. Насыпха, шёндю элде аталары-аналары бла жашаргъа сюйгенле кёпдюле. Ийман кючлене барса, баям, ичги бла наркомания къурурла, сора  тамата тёлюню арасында жунчугъанла  да азыракъ боллукъдула.