Медицина болушлукъну жангы амаллары

РФ-ни Саулукъ сакълау министерствосуну баш нейрохирургу, Россейни Илмула Академиясыны академигин, профессор Владимир Крыловну башчылыгъы бла Къабарты-Малкъарда «Организация системы хирургической помощи пациентам с фармакорезистентными формами эпилепсии в Российской Федерации» проектни жашаугъа кийириу башланнганды. Ол къыралны жаланда сегиз регионунда бардырыллыкъды.

Жууукъ заманны ичинде Республикалы клиника больницагъа медицина болушлукъну жангы амалларын кийирликдиле. Аны бла байламлы КъМР-ни саулукъ сакълау министри Рустам Калибатов, Владимир Крылов, Республикалы клиника больницаны баш врачы Мурат Муков эм А.И.Евдокимовну атлы МГМСУ-ну нейрохирургия кафедрасыны ассистенти Игорь Трифонов бла тюбешип, проектни толтурууну, махкемеде медицина страхованияны чеклеринде кийириллик жангылыкъланы юслеринден сёлешгендиле. Дагъыда эпилепсиядан къыйналгъанлагъа республикалы клиникада хирургия болушлукъ тапдырыллыгъын да чертгендиле.

Ол кюн окъуна саулукъ сакълау министр, проектге къатышханланы, республиканы алчы неврологларын бла нейрохирургларын чакъырып, «тёгерек стол» къурагъанды.  Игорь Трифонов проектни юсюнден жыйылгъанлагъа толу хапар айтханды эмда МГМСУ-да ол ахшы толтурулгъанын билдиргенди. Аны айтханына кёре, дуния статистиканы эсеплери бла, 100 минг адамдан онусу хар жылдан эпилепсия бла ауруйду, алай бизни къыралда, нейрохирургияны алчы амаллары болгъанлыкъгъа, айтылгъан саузузлагъа заманында медицина болушлукъ бериу система жокъду. Профессор Владимир Крылов жангы амалланы жаланда регионлада сынаргъа излейди, нек дегенде аланы болушлукълары бла эпилепсияны диагностикасы эмда саусузланы багъыу игиге айланырыкъды. Бизни больницабызда бийик квалификациялы врачла, нейрохирургия амалла болгъанлары эм аны даражасы жюрюгени ючюн сайланнганды. 

Рустам Калибатов къонакълагъа ыразылыгъын айтханды эмда бу жангы проектге билеклик этеригин айтханды, деп билдиргендиле КъМР-ни Саулукъ сакълау министерствосуну пресс-службасындан.

 

ТОКУМАЛАНЫ Салим.
Поделиться: