Жаш тёлю экологиягъа аслам эс бурурча

Кёп болмай Къабарты-Малкъар  бийик-тау заповедникде «Аманатлы  Къабарты- Малкъар» республикалы  экология проектни чеклеринде «Биз - аманатлы шуёхлабыз» деген акция  болгъанды. Анга  Мечиланы Кязим атлы жаш тёлю  библиотеканы келечилери эм  Нальчикни 12-чи номерли орта школуну окъуучулары бла устазлары да къатышхандыла.   

Акцияны  магъанасы   жаш тёлюню эсин табийгъатны сакълаугъа бурургъа эм бу жаны бла культураларын ёсдюрюргеди. Аны чеклеринде   школчула Къабарты-Малкъарны энчи сакъланнган жерлерини юсюнден билимлерин кёргюзтгендиле.  Ол санда  ала айнырча  адам улу  себеплик этерге кереклисин да билдиргендиле. 

Ызы бла ала заповедникге жораланнган киногъа къарагъандыла, акъыл-жарыкъландырыу оюнлагъа да къатышхандыла. Быллай жерледе адам кесин къалай жюрютюрге кереклисине да юйреннгендиле.  

Жаш тёлюню табийгъатын сыйларгъа юйретиуде Мечи улу библиотеканы сабийле бла ишлеген бёлюмю да  уллу къыйын салады.    Бу жол да ала экология бла байламлы  проблеманы юсюнден сейир хапарла айтхандыла,  викторинала бардыргъандыла эмда юйлеринде окъурча бу жаны бла тематикалы китапла сайларгъа болушхандыла. 

КъМР-ни  бийик-тау заповеднигини коллективи  быллай магъаналы акцияны бардырыугъа ахшы  къошумчулукъ этгенлери ючюн  библиотеканы эм мектепни да келечилери Парзиева Мирагъа, Кештова Рузанагъа, Афаунова Аминагъа, Алоева Алинагъа, Мигулина Татьянагъа ыразылыгъын билдиреди. 

 

Тогъузаланы Лейля.
Поделиться: