Ёлгенни асырау бла байламлы уллу къоранчла этилмезча

Кёп болмай Къабарты-Малкъарда жашагъан биреулен  Instagram – социал сетьде ёлюкню асырау бла байламлы  уллу къоранчла этилгенин айтып, жарсып жазгъанды. Анда жыл санлары келген  уллайгъанла  пенсиячыкъларын ёлюр кюнлерине деп жыяргъа кюрешгенлери,  аны хатасындан саулукъларына тийишлисича къараталмагъанлары эм  толусунлай коммунал    налогларын да тёлеялмагъанлары да  сагъынылады.  Ол себепден, автор  болумну тюзетирча, керексиз уллу къоранчла этилмезча, аны  закон  бла чеклендирирге  кереклисин  белгилейди. 

 - Республиканы дин таматалары бу жаны бла бир себеплик этселе борчлуду – къайгъы сёзге келгенлеге тойладача,  ашханала къурауну,  хуржунла юлешиуню къурутургъа керекди.   Аны хатасындан бир-бир юйюрле ёнкючлеге  киредиле, аны жылла бла тёлегенле да бардыла.  Кёп болмай мен таныгъан  бир юйюрню  борчлары ючюн  къышны ортасында  газларын кесип кетгендиле.   Аны уа баш сылтауларындан бири - абаданла кишини боюнуна тюшмезча «къара кюнлерине»  пенсияларын жыйып тургъанларыды,-  деп жазады нальчикчи.

Керитиси бла  бу  проблема  республикада башха регионлада  да  жылла бла барады, кёп жерледе кётюрюледи, алай алыкъынчы  уллу тюрлениуле уа эсленмейдиле.  Интернетде уа быллай башламчылыкъгъа  кёпле  бюсюрегендиле. Ма аладан бир къаууму: 

- Республикада  ким аламат сабий табады,  той этеди деп  эришедиле,   ауушханны окъуна  бирсиледен  игиракъ  ашырыргъа кюрешедиле.   

- Адамла, жангы адетлени  къурап, аланы ким толуракъ бардырыр деп   жанларын атадыла. Къарт адам къыстырыкъла этмезча уа, къатында кеси ышаннган,  къарагъан адамы болургъа керекди. 

- Кёпле быллай адетни ауурлугъун  ангылагъанлыкъгъа, тёгерекдегиле  не айтырла деген акъылда,  тюрлениуле  кеслеринден башлансала   сюймейдиле.

- Бирсиледен игиракъ болургъа итиниулюк, ол халкъларыбызны   къылыкъларындады.

Терен кире турмай, оюм этип къарасакъ, кёп зат кёзбаулукъгъа   этиледи. Ауушханны жууукълары  аны ёлгенинден эсе, халкъда жюрюген  адетни бузмаз ючюн  жарсып, дыгаласха къаладыла.  Динде бу жаны бла талай  зат келишмегени да айтылады.   Къалай-алай болса да  дуалада жыйылгъанда   эфендиле  бу шартланы юсюнден жамауатха билдире-билдире турургъа керекдиле.