Борчу буюргъанын, жюреги айтханын толтура

Тёбен Чегемден Къаракъызланы Сафар жашауун толусунлай ич ишледе къуллукъ этиуге жоралагъанды. Бу сёзню да бошдан айтмайма, ахыр кюнюне дери  формасын  юсюнден хазна тешмегенди.

Сафарны атасы Жабраил  Думала элде колхозну председатели болуп тургъанды, анасы Шауаланы Махайны къызы Халиматны уа ёмюрю юй жумушланы толтурууда кетгенди. Жашыны ариу къылыкълы, адепли, тюз ниетли болуп ёсгенинде аны къыйыны уллу эди.

Жабраилны юйюрю  кёчгюнчюлюкню, ачлыкъны, жаланнгачлыкъны да сынагъанды. Аны ючюн а бюгюлмегенди. Тюбеген къыйынлыкъланы хорлай, алгъа таукел баргъанды.

Таулулагъа туугъан жерлерине къайтыргъа эркинлик бергенлеринде уа, биринчилени санында келгенди. Тёбен Чегемде юй, журт салгъанды. Сафар а Калмыков атлы колхозда эсепчи болуп ишлеп башлайды. Буюрулгъан жумушну тынгылы  тамамлагъаны ючюн жашны комсомол комитетни председателине айырадыла. Бир жол а мюлк жыйылыуда Бакуда милицияны школуна  адам жиберирге керекди деген оноу келгенини юсюнден айтылады. Сайлау Сафаргъа тюшеди. Алай бла жаш комсомол путёвкасы  бла окъургъа барады.

Къолуна алгъан жумушну айыпсыз толтурургъа юйреннгени себепли анда да айырмалы болады. Къайтхандан сора уа аны Тырныауузда ГОВД-ны акъылбалыкъ болмагъанланы ишлери жаны бла бёлюмюне жибередиле. Ол жыллада магъаданчыланы шахарында хал тынчлыкълы тюйюл эди. Тутмакъда кеслерин тап жюрютгенлени  къалгъан заманларын ётдюрюрге ары жибергендиле. Тау-байыкъландырыучу комбинатда кёп миллетлени келечилери тургъандыла.

Аланы араларында ичгичиликге берилип, юйюрлерине эс бурмай къойгъанла да кёп эдиле. Аллайланы  сабийлери уа орамланы санап, къайда не хыли этейик, кимни не затын урлайыкъ деп айланнгандыла. Ма аланы жыйышдырыу, ала бла юйретиу-ангылатыу иш бардырыу, ёсюп келген жашчыкъланы бла къызчыкъланы  осал ишледен тыйыу - Сафарны баш магъаналы борчу болгъанды.

Акъылбалыкъ болмагъанланы араларында аманлыкъ ишлени  санын иги да къысхартыргъа себеплик этгени ючюн Къаракъызланы Сафаргъа 1968 жылда  КъМАССР-ни Баш Советини Президиумуну Сыйлы грамотасын бередиле. Ол жыл окъуна  Гаммайланы Хызырны къызы Жаннет бла бир къош болады.

Андан сора жаш паспорт столда инспекторлукъ этеди, ызы бла Чегем районда  бёлюмюню таматасыны къуллугъун толтурады. Пенсиягъа милицияны майору чында чыгъады. Алай бир кюнню да бош турмагъанды: Федерал миграция службаны КъМР-де Управлениясыны ветеранларыны къымылдаууна ахыр кюнюне дери тири къатышханды. Мектеплеге  барып, сабийле бла тюбешип, ала бла ушакъла бардыргъанды.

Къырал къуллугъун бет жарыкълы  толтургъанындан сора да,  тёрт сабий да ёсдюргенди. Онтёрт туудугъу аны  къууандырып тургъандыла. Къызы Марзият атасыны усталыгъын сайлагъанды. Ол  Элбрус районда  миграция иш жаны бла  бёлюмде къуллукъ этеди, полицияны капитаныды. Аны тамата жашы Аскербий  Санкт-Петербургда А.В.Хрулев атлы  аскер академияны бошап чыкъгъанды.

Бюгюнлюкде Сафарны сабийлери, туудукълары да аны кёп майдаллары, сыйлы саугъалары бла ёхтемленедиле. Аланы араларында СССР-ни МВД-сыны, КъМАССР-ни Ич ишле министерствосуну сыйлы грамоталары,  «Ич ишле органлада бет жарыкълы къуллукъ этгени ючюн» майдалны битеу даражалары, «Совет милицияны 50-жыллыгъы», «Урунууну ветераны» деген белгилери да бардыла.

Биргесине къуллукъ этгенле, аны таныгъанла, ол угъай да, Тырныауузда  акъылбалыкъ болмагъанланы ишлери жаны бла бёлюмде къуллукъ этген заманында ол тюз жолгъа салгъан жашла да  бюгюнлюкде Сафарны атын хурмет бла эсгередиле. «Уллу адамлыгъы бар эди, керек заманда кимге да билеклик этерге хазыр»,-дейдиле.