Посланияда салыннган борчланы толтурургъа себеп болурча ишлерге хазырбыз

РФ-ни Федерация Советини башчысыны орунбасары Андрей Турчак, Россейни Правительствосуну жангы къаууму къуралгъаныны юсюнден оюмун айта, «Единая Россия» толтуруучу власть органлагъа партияны кёзюнден къарагъанын чертгенди. «Министрлени кабинети  партияны келечилеринден къуралгъаны бла бирге, биз барыбыз да бир борчну тамамлайбыз: РФ-ни Президенти салгъан буйрукъланы»,-дегенди ол.

Ол Правительствону мурдору алышынмагъанын иги шартха санагъанды. Партияны оноучу органларына кирген инсанла министр къуллукъларын сакълагъандыла: эл мюлк министр Дмитрий Патрушев, табийгъат байлыкъла эм экология министр Дмитрий Кобылкин, къурулуш эм ЖКХ министр Владимир Якушев, транспорт министр Евгений Дитрих эм къоруулау министр Сергей Шойгу.  

Андрей Турчак власть органлагъа жангы адамла къошулгъанларын да тюзге санагъанды. Болсада ала да партияны келечилеридиле: экономиканы айнытыу министри Максим Решетников, жарыкъландырыу министр Сергей Кравцов.

- «Единая Россия»  Правительствону жангы къаууму бла хайырлы байламлыкъла къураргъа хазырды,-деп белгилегенди  партияны Генеральный советини секретарыны  орунбасары Ольга Баталина.  

Ол Президентни Посланиясы власть органлагъа жууаплылыкъны къатыландыргъанын чертгенди. «Жангы министрле салыннган борчланы толтурурла деп ышанама. Партия уа Правительство бла бирге ишлерге хазырды»,-дегенди ол.

Аны айтханына кёре, экономиканы айнытыу министрге Пермь крайны губернатору Максим Решетников салыннганы артыкъда магъаналыды. «Регионладан бу ведомствогъа тарыгъыула кёп эдиле, жеринде власть органла алада болгъан жарсыула  тамамланмагъанларын дайым да айтхандыла. Энди уа бу кемчиликлени кетерирге онг барды»,-деп чертгенди ол.

Къырал Думаны спикерини орунбасары Пётр Толстой а министрле сынаулу болгъанларын белгилегенди. Юлгюге ол  вице-премьер Марат Хаснуллинни келтиргенди. «Ол профессионал билимли адамды.  Москвада шахар къурулуш бардырыуну хайырлы системасын къурагъанды. Неда жарыкъландырыу министр Сергей Кравцов Рособрнадзоргъа башчылыкъ этген кезиуде бийик билим бериу системада низамлылыкъны тохташдыргъанды»,-деп оюм этеди Пётр Толстой.

Дагъыда къоруулау министр Сергей Шойгу бла тыш къыралла бла  ишлени министри Сергей Лавров къуллукъларында къалгъанларына ыразы болгъанын да билдиргенди ол. «Кюч блокда тюрлениуле жокъдула. Ол а къыралыбызны, инсанланы къоркъуусузлукълары жалчытылынырыгъына ийнандырады»,-деп къошханды ол.

Сёзюню ахырында депутат алгъыннгы Правительство  салыннган борчланы бийик даражада толтургъанын айтханды. «Министрлеге сау болугъуз дерге сюеме. Аланы иш кёллюлюклерини хайырындан къыралда иги жанына тюрлениуле болгъандыла»,-дегенди  Пётр Толстой.