Адам эм закон

Алтынны жууугъу урлагъанына ишеклик барды

Нальчикни полициячылары алтын затланы урлагъанына ишеклини бир кюнню ичинде тохташдыргъандыла.   

Быйыл 15 январьда РФ-ни МВД-сыны Нальчикде 1-чи номерли бёлюмюне 51-жыллыкъ тиширыу тарыгъып келгенди. Аны билдиргенине кёре, былтыр 5 декабрь-быйыл 15 январьгъа дери кезиуде, тышырыу юйюнде болмагъанды ол кюнледе, аны журтундан 455 минг сом багъасы алтын затла урланнгандыла.

Бёлюмню уголовный розыскыны къуллукъчулары оператив-излеу жумушланы кезиуюнде   аманлыкъны этгенине ишеклини бир кюнню ичинде тохташдыргъандыла. Ол бир кезиуде тиширыуну юйюнде жашагъан 19-жыллыкъ жууукъ къыз болуп чыкъгъанды. Аны айтханына кёре, алтынланы асламын ол сатханды. Ишеклини юйюн тинтгенде, мюлкюн тас этген тиширыуну алтын сагъатлары бла жюзюгю табылгъандыла.

Бу шартла бла байламлы РФ-ни УК-сыны 158-чи статьясыны 3-чю кесегине кёре (уручулукъ) терслеу материалла жарашдырылгъандыла.

Хыйлачылагъа ийнанып, ахчаларын тас этгендиле

Бир кюнню ичинде республиканы эки инсаны кеслерин хыйлачылагъа алдатып, ахчаларын тас этгендиле. КъМР-де МВД-дан бизге билдиргенлерича, 27-жыллыкъ прохладначы тиширыуну телефонуна минг сом къоллу болур ючюн банк картасын сайтда эсепге салыргъа кереклисини юсюнден билдириу келгенди. Тиширыу жазылгъанны толтургъанды, алай къысха замандан аны банк картасындан 7,1 минг сом тас болгъанды.

Нартандан 34-жыллыкъ тиширыугъа уа белгисиз адам сёлешип, банкда ишлегенин айтханды. Ол аны алдап, банк картасыны тарихлерин билгенди, ызы ба уа андан 9,4 минг сом тас болгъанды.

Ууну кесине ичерге асырагъанды

Быйыл 14 январьда оператив-тинтиу жумушланы кезиуюнде Наркоконтрольну полициячылары 55-жыллыкъ нальчикчини юйюнде бир ненча коробка бла артмакъла тапхандыла. Алада белгили ийиси бла кырдык бар эди.

Экспертиза ол «марихуана» наркотик болгъанын, ауурлугъу 2636,7 граммагъа жетгенин тохташдыргъанды. Эр киши ууну кесине ичерге асырагъанын айтханды.

Бу шартла бла байламлы РФ-ни УК-сыны 228-чи статьясыны 2-чи кесегине  кёре терслеу материалла ачылгъандыла. Эр киши законлагъа бузукълукъ этип, наркотиклени сатып алгъаны, асырагъаны, жюрютгени ючюн терсленеди. Быллай бузукълукъ этгенни эркинлиги юч жылдан он жылгъа дери сыйырылыргъа, 500 минг сомгъа дери тазир салыныргъа боллукъду.