Электрон тюкенде сатыу этерге чакъырадыла

   Республиканы ара шахарыны жер-жерли администрациясындан былтыр сынам халда къуралгъан «Витрина малых закупок городского округа Нальчик» деген электрон тюкен къыйматлы ишлегенин билдиредиле. Бу проектни магъанасы –шахаргъа керекли аберилени сатып алыуну ачыкъ халда, кеси да бюджет ырысхыны аяп алай тамамларгъады. Аны хайыры бла ол ишге гитче эмда орта бизнес бла кюрешгенле да къатышаллыкъдыла. Анга деп ала товарларыны неда не тюрлю жумушла тамамларгъа боллукъларыны каталогун жарашдырыргъа, аланы да багъаларын туура этерге керекдиле. Алыучу уа аланы арасында кесине тийишли затланы сайларгъа боллукъду. 
   Бу амал, сёзсюз, конкуренциягъа, бюджет ахчаны да аяугъа иги себеплик этерикди. Сатыу-алыу «Сбербанк-Автоматизированная система торгов (АСТ)» компанияны «SberB2B» порталыны мурдорунда ишлеген «Витрина малых закупок городского округа Нальчик» системада бардырылады. Саулай алып айтханда, былтыр сентябрьден башлап электрон тюкенде 119 келишим этилгенди.