Осал къылыкъладан чыгъады бу ауруу

Кёп болмай СПИД-ге къажау кюрешни битеудуния кюнюне жораланып КъМКъУ-ну педагогика  колледжинде профилактика эм саулукълу жашау этиу бла байламлы «тёгерек стол» ётгенди. Экспертле ол аурууну юсюнден, ол къалай жукъгъанын, андан сакъланыр ючюн, не этерге кереклисин да айтхандыла. Жыйылгъанлагъа  кино да кёргюзтюлгенди. Анда бизни республикада болум да доюн  болмагъаны,   аманлыкъ терк жайылып баргъаны да белгиленнгенди.
Аны юсюнден толуракъ ВИЧ-ге эм СПИД-ге къажау араны врачы  Къайгъырмазланы Жамиля билдиргенди. Ол айтханнга кёре, шёндю эсепде 757 адам турады. Быйыл озгъан тогъуз айгъа аладан  отуз ючюсю ауушхандыла. Ауруу кишини да аямагъанын эсге салгъанды ол.  
      Тюбешиуде ауругъанланы  жамауатдан айырыргъа сылтау болмагъаны да айтылгъанды. Алай адам ауругъанын букъдурса  эмда жукъдурмазча мадар  излемесе уголовный  жууапха тартылыргъа боллукъду, деп билдиргенди полицияны 1-чи бёлюмюню акъылбалыкъ болмагъанла бла ишлеген инспектору Галина Яковлева.  Тери ауруула эм венерология жаны бла врач Латмир Пшуков а жаш адамланы  осал къылыкъдан кери, саулукъларына уа сакъ болургъа чакъыргъанды.
- Наркоманла айтылгъан къыйын ауругъанланы биринчи тизмесиндедиле.  Аны ючюн нёгерлени, жыйылгъан жерлени да сайлагъанда сакъ болугъуз,-дегенди Наркодиспансерде психология эм социал иш жаны бла бёлюмню таматасы Инна Кабалоева.