«Бу аурууну сылтаулары кёпдюле»

Шёндюгю урологияда  без  ауруу – простатит -иги да кенг жайылгъанды.  Ахыр шартлагъа кёре, андан битеу эр кишилени отуз элли процентге жууугъу къыйналадыла. Аны юсюнден  Нальчикде шахар больницаны  урологу, андрологу  эм онкологу Улбашланы Азамат бла ушакъ этгенбиз.

- Азамат,  таулула простатитге, аденомагъа, дагъыда башхаларына да къууукъ ауруу деп къойгъандыла. Биз бюгюн сайлагъан теманы бёлюп, кесин энчи, шарт ангылатыргъа боллукъмуду?

- Кереклиси да алайды. Болсада халкъда баш ауруу, къарын ауруу деп жюрютюлгенича, ол да битеулю айтылгъан затды. Медицинада уа алай болмайды.Хар ауруу энчи бёлюнеди, энчи тинтиледи, багъыу да анга кёре къуралады.Не затды бу предстательный без, простатит дегенибиз? Жарсыугъа, шёндюгюлю медицинаны къолунда хронический простатитни айныууну белгилерини бла механизмлерини сылтаулары бла байламлы терен тинтилген эмда тюз тохташдырылгъан шартла жокъдула, башхача айтханда уа, кёбюсюнде аны сылтаулары эм саусуз андан къалай къыйналгъаны илмуда жазыла эсе да, толусунлай ачыкълыкъ а жокъду. Предстательный безни ауругъаныны сылтаулары кёпдюле, энчи алып айтханда уа, ол аз къымылдау, аз жюрюу, тиширыу бла бирге жашагъанда гигиенаны жорукъларына сакъ болмау, иги да билмегенлей, дарманланы кереклисин, керексизин да контрольсуз ичиу, тёгерекде болгъан затланы хаталы шартларыны себеплик этиулери эм башхалары бла байламлыды.

- Аурууну билирге, анга ишекли болургъа уа онг бармыды? Бек биринчи белгилери къалай башланадыла?

- Простатитни  белгилери быладыла: адамны предстательный бези болгъан жери  ачытып, тынгысыз этеди, ол зат юч айгъа, андан да кёп заманнга созулады. Чат арасы, киндик тюбю, къуйрукъ сюеклери бирге къошулгъан жер бегирек къыйнайдыла, импотенция башланыргъа болады,  кеси керегин къыйналып этгени эсленеди.

Ауруу бирде къаты тутханча болады, бирде уа бошлайды. Ол сезоннга кёре болгъаны да белгилиди. Къозгъалып, къыйыннга айланнганы кёбюсюнде жаз башына, кюз артына бла къыш кезиулеге тюшеди, адамны чархы сууукъ болгъандан сора.

-  Кёпледе хроникалы  простатит багъыудан сау болуп къалмайды, жаланда сынтыл этиледи деген оюм жюрюйдю. Кертиси да алаймыды?

- Угъай, ол тюз тюйюлдю. Хроникалы  простатит дегенибиз предстательный безни терсейгениди,  аны сылтауу уа жугъуучу вирусла - инфекция бла байламлыды. Вирусла къозгъайдыла ол терсейиуню да. Инфекцияны тохташдырыуну, аурууну къозгъагъан вирусланы къурутууну жолу эмда амалы бла багъылады саусузгъа.

Болсада кёпле  ауруу осалгъа айланнгынчы  урологга барыргъа сюймейдиле. Ол а къарангылыкъдан, жахилликден, тюзю уа, медицина жаны бла билимсизликден чыгъады деп, мен алай сунама. Бу зат артыкъда бизни эллерибизде кёбюрек тюбейди. Врачха барып, ачыкъ айтырны орунуна саусузларыбыз, уялгъандан, тёзерге кюреше, артда бек амалсызгъа къалгъанларында излеп башлайдыла бизни.

Алай бла саулукъларын да, ауруу башланнганлай окъуна андан къутулургъа керекли заманларын да тас этедиле. Жарсыугъа, кёпле рекламалада айтылгъан тюрлю-тюрлю дарманланы бла препаратланы хайырланыу бла кеслери кеслерине багъаргъа кюрешедиле. Ахырында уа дарманлагъа, врачлагъа ийнанмай башлайдыла. Пациентни психикасы бузулады, саулугъу иги жанына тюрленмейди, ол угъай да, осалгъа айланады. Аны баш сылтауу уа -керекли дарманла тюз тохташдырылмагъаны, аланы хайырланыу да тюз бардырылмагъаныды.

-Алгъын  бизни адамларыбыз ёлюк чыкъгъан жерде сау ыйыкъны ичинде тышында сууукъда кёп олтура эдиле, малгъа къарагъанларыбыз да сууукъда кёп айланадыла.  Ол да сылтауладан бирлери болур эди?

-Бу аурууну къозгъагъан, аны чыгъарыны да сылтауларындан бири керти да,  сууукъ болууду. Не да этип, сууукъ болмазгъа кюреширге керекди. Простатитни бек биринчи симптомлары эсленнгенлей окъуна, кеси кесине багъыу бла кюрешмей, специалистге барыргъа керекди. Ол а урологду. Бусагъатда бизни медицинабызда бу аурууну диагностикасыны, анга багъыуну кёп кереклери, амаллары да табыладыла. Энчи айтханда, бизни 1-чи номерли поликлиникабызны болумларында тынгылы тинтирге керекли онгла бардыла: инфекцияны тохташдырыу, предстательный безге УЗИ-де къарау, керек болса, энчи анализле этдириу дегенча.

Хронический простатитге тынгылы багъаргъа керекли жангы дарманлагъа кёре да проблема боллукъ тюйюлдю. Багъыуну эки амалы барды: биринчиси дармансыз багъыуду, экинчиси уа дарманла бла. Дармансыз багъыу аз энергетикалы  инфракъызыл лазер терапияды. Органда жара табыча инфильтративный тюрлениуле кёбюрек болгъанларында, бу амал бла багъыуну хайыры игиди, аны себепли бу амалны къыйыннга айланнган хроникалы  простотовезикулитге, эпидидимоорхитге багъыуда хайырланадыла. Багъыуну бу амалы къыйын тюйюлдю, бек хайырлыды.

Багъыуну дарман бла бардырылгъан амалы тохташдырылгъан инфекциягъа
кёре антибиотиклени, безде къанны жюрюуюн, адамны чархыны иммун системасын игилендирген препаратланы хайырланыуду. Аны да ангыларгъа боллукъду: биз аурууну  угъай, саусузну  багъабыз. Алай бла багъыу жетишимли болур ючюн, бек алгъа аурууну сылтауларын, микроорганизмлени тохташдырыргъа керекди.
Бек магъаналы зат: заманында врачха барып, ол айтханны этерге керекди.

Ушакъны Таулуланы Мадина бардыргъанды.
Поделиться: