Хорламын ёз журтуна жоралагъанды

Январьны ал кюнлеринде «Голос» жыр проектни сегизинчи сезонунда хорлагъан Аскер Бербеков туугъан жерине, Къабарты-Малкъаргъа  къайтханды. Анга миллет тепсеуле эмда жырла бла тюбегендиле. Тюбешиу Абхазия майданда ётгенди. Сууукъгъа да къарамай, жашны аллына мингден аслам адам келгенди.

- Сизге ыразылыгъым чексизди. Билеме, къол кётюрюуде бизни республикадан аслам процент жыйылгъанын. Проектде болгъан кезиуюмде, сиз манга билеклик этип, кёллендириу сёзле жазып тургъансыз – ол жангы къарыу алыргъа болушханды. Сау болугъуз! Бу хорламымы бизни чексиз ариу республикабызгъа жоралайма! – деп, Аскер жюрек ыразылыгъын билдиргенди жыйылгъанлагъа эмда белгили жырларын да айтханды.

Концертде Къабарты-Малкъар Республиканы Башчысы Казбек Коков Аскер Бербековха «КъМР-ни сыйлы артисти» деген атны берирге указгъа къол салгъанын КъМР-ни культура министрини къуллугъун толтургъан Мухадин Кумахов, сахнагъа чыгъып, къууанчлы халда билдиргенди. Жыйылгъанла бу ахшы хапаргъа къызыу къарсла бла тюбегендиле.