Къабарты-Малкъарда ортопедияны шёндюгю заманнга келишген бёлюмюн къурауну онглары сюзюлгендиле

Къабарты-Малкъарны Башчысы Казбек Коков бу кюнледе федерал медицина араланы баш специалистлери бла тюбешгенди.  Ушакъгъа аты дуниягъа айтылгъан россейли нейрохирург, РАН-ны академиги, профессор, Н.В.Склифософский атлы нейрохирургия бёлюмню баш илму къуллукъчусу Владимир Крылов, Терк болушлукъ берген Н.В.Склифософский атлы илму-излем институтну нейрохирургия бёлюмюню таматасы Виктор Лукьянчиков, Москвада А.И.Евдокимов атлы медико-стоматология къырал университетни Клиникалы медицина арасыны травматолог-ортопед врачы Михаил Сычевский къатышхандыла.

Аны кезиуюнде Къабарты-Малкъарда ортопедияны шёндюгю заманнга келишген бёлюмюн къурауну онгларыны, къан тамырлагъа операцияла этиу, ол санда эпилепсиядан багъыу жаны бла битеу болгъан алчы эмда къыйматлы амалланы сингдириуню   юсюнден сёлешиннгенди. Къабарты-Малкъарны къырал университетини бла РФ-ни Саулукъ сакълау министерствосуну араларында къол салыннган келишимге кёре бюгюнлюкде  республикада башында айтылгъан бёлюмюлеге жаш специалистлени хазырлау  иш жетишимли баргъаны белгиленнгенди. 

Федерал специалистле Къабарты-Малкъарда уста хирургла кёп болгъанларын айтып, республиканы оноучуларына саулукъ сакълауну айнытыугъа уллу эс бургъанлары, къайгъыргъанлары ючюн да жюрек ыразылыкъларын билдиргендиле.

Тюбешиуню кезиуюнде саугъалау да болгъанды. Казбек Коков Михаил Сычевскийге бла Виктор Лукьянчиковха Къабарты-Малкъар Республиканы Сыйлы грамоталарын бергенди.

Эсгертиу халда: Владимир Крылов  бизни республикада  Къан тамырла бла байламлы ауруулагъа багъыу жаны бла регион ара къураугъа уллу къыйын салгъанды, андан бери аны специалистлерини ишлерине кёз-къулакъ болгъанлай турады, къыйын  операцияланы бардырыргъа болушады, хирургланы усталыкъларын ёсдюрюуге себеплик этеди. Ол айтханнга кёре, Республикалы клиника больницада къуралгъан регион ара  СКФО-да бла ЮФО-да игиледен бириди.

Къабарты-Малкъарда  академик Владимир Крыловну башчылыгъы бла нейрохирургия жаны бла уллу халкъла аралы конференцияла да ётедиле.

Виктор Лукьянчиков Къан тамырла бла байламлы ауруулагъа багъыу жаны бла регион арада 2016 жылдан бери ишлейди. Ол кезиуню ичинде операция этиуню жангы амалларын сингдиргенди, араны хирурглары бла бирге мыйыгъа, боюн къан тамырлагъа эмда аллай башха операцияладан 250 чакълысын бардыргъанды. Аны бла бирге ишлеу республикада жюрек эмда къан тамырла бла бла байламлы хирургияны айнытыргъа, регион араны специалистлерини усталыкъларын ёсдюрюрге уллу себеплик этгенди.

Михаил Сычевский аякълары, бутлары, беллери , сырт сюеклери ауругъанлагъа багъыу жаны бла устады. 2018 жылдан бери Республикалы клиника больницада травматолог-ортопед врач болуп ишлейди. Больницаны специалистлерине бла ординаторларына дайым да мастер-классла бардырады. 2018 жылдан бери мында жюзден артыкъ къыйын операция этгенди.