Мияланы – бир жанына, къагъытны - башхасына

    Келир айда Бахсан шахарда бир жылгъа 50 минг тонна кир-кипчикни жарашдыргъан комплекс ачыллыкъды. Аны къурулушуна 34  миллион сомдан аслам къоратылгъанды, деп билдиргенди муниципалитетни  администрациясыны башчысыны жашау болумну жалчытыу вопросла  эм къоркъуусузлукъ жаны бла орунбасары  Назир Карданов.
    Комплексни къурулушу былтыр октябрьде башланнганды.  Анга 34,5 миллион сомдан аслам къоратылгъанды. Аны  32 миллиону - федерал бюджетден бёлюннгенди, къалгъанын а республика кесинден къошханды. «Бюгюнлюкде объектде бар жумушла тамамланнгандыла. Февральны ахырында ары кир-кипчикни ташып эмда жарашдырып  башларыкъдыла», - дегенди Назир Карданов.
     Къалгъан-къулгъанланы он адам къол бла айырлыкъдыла. Сёз ючюн, картон къагъытны, мияланы, полиэтиленни энчи машоклагъа жыйып, экинчи кере жарашдырырча цехлеге ашырлыкъдыла, башха затланы уа полигоннга тёгерикдиле.
    Саулай алып айтханда, предприятияда эки жыйырма адам ишлерикди. Аланы айлыкъ хакълары 16-17 минг сом боллукъду.

 

Магометланы Сулейман.
Поделиться: