Россейни чемпионатында тутушурукъдула

Къабарты-Малкъарда «Нальчик» спорт комплексде спорт эм аскер самбодан СКФО-ну чемпионаты бардырылгъанды, анда хорлагъанлагъа 2020 жылны мартында Чебоксарыде боллукъ къырал даражалы эришиуге къатышыргъа онг берилгенди.  Турнирде субъектни битеу регионларындан 200-ден аслам атлет тутушхандыла, бизни республикадан спортчула 15 майдал къытхандыла.
 
«Алтын» бла спорт самбода 52 килограммгъа дери ауурлукъ къауумда эришген Гуппойланы Алина къууандыргъанды. Кюмюш майдалланы Рустам Куржиев (52кг.), Арамби Ошхунов (82кг.) бла Астемир Ахметов (+100кг.) къытхандыла. Мухарбек Гороев (57кг.), Мухамед Мешев (62кг.), Адам Темроков (74кг.), Азамат Шогенцуков (82кг.), Виктор Иванченко (90кг.), Артур Тюльпаров (100кг.) ючюнчюле болгъандыла. Арамби Ошхунов бла Рустам Куржиев спортну устасыны нормативин толтургъандыла.
 
Аскер самбода Олег Багов (82кг.) хорлагъанды. Экинчи жерге Замудин Урусов (52кг.),  Андемиркан Кушхов (74кг.), Сафарби Бегидов (100кг.) чыкъгъандыла. «Доммакъны» Артур Тюльпаров (100кг.) алгъанды.
 
Спортчуланы тренерле Олег Саральпов, Мухамед Боготов, Башир Ошхунов, Байтуугъанланы Руслан, Ксаналаны Алим, Залим Гаданов эм башхала юйретедиле.
Кульчаланы Зульфия.
Поделиться: