«Энчи» сабийлеге – энчи къайгъырыу

Арт жыллада санларында къыяулары болгъан сабийлени окъутуугъа, хар жаны бла да айнытыугъа уллу эс бурулады. «Барысына да билим бериу» деген регионла аралы проект да ол муратда къуралгъанды.  Аны чеклеринде федерал эмда регион билим бериу учрежденияла бир бирге сынауларын билдирип тургъандыла. Аллай  энчи сабийлени окъутууну шёндюгю амаллары бла ишлерча  этиуге артыкъда уллу эс бурулгъанды.

«Саулукъну школу билим бериу ара (Москва), Саратов областьны  «Жамауат дипломатия» илму-практика арасы, бу жерли Сатыу-алыу-промышленность палатада психологланы бла педагогланы биригиуюн, Тырныауузда Отарланы Керимни атын жюрютген 1-чи номерли лицейде «Энчи сабий» ресурс ара ол жаны бла бирге ишлегенли юч жыл болады. Билим бериу учреждениялада инклюзив ишни къурауну уллу программасына кёре педагоглагъа усталыкъларын кётюрюрге, практика ишлеге къатышыргъа, сорууларына жууапла да алыргъа онг чыкъгъанды.

 Саратовну, Москваны, Тырныауузну устазларына бирге тышында мастер-классла, стажировкала, консультацияла, семинарла-тренингле, семинарла-практикумла, конференцияла бардырыладыла. Ата-анала да проектни толтуруугъа тири къатышадыла. Алагъа педагогика жаны бла билимни ёсдюрюрге онгла чыкъгъандыла.

Тырныауузда да «Энчи сабий» ресурс арада «Энчи сабийле: сынаула эм проблемала» деген регион семинар-практикум ётгенди. Ол юч кюнню баргъанды. Анга, Элбрус районну билим бериу махкемелеринде ишлегенледен сора, проектни партнёрлары, ол санда КъМКъУ-ну Усталыкъланы кётюрюу эмда жангыларына юйретиу жаны бла институтуну, Нальчикде 5-чи номерли мектепни, 1-чи номерли интернатны, «Звёздочка» санаторийни, Бахсанны 3-чю номерли прогимназиясыны келечилери да къатышхандыла.

Семинарны кезиуюнде санларында къыяулары болгъан  сабийле, башхалача, школгъа бла сабий садха жюрюрча, алача, билим алырча къалай этерге боллугъуну юсюнден тынгылы ушакъ баргъанды. Ата-аналагъа да юйретиу дерсле къуралгъандыла.