Жаш тёлю, политика, айырыула

   Бу кюнледе  «КъМР-ни  профсоюз организацияларыны биригиую" союзну уллу залында жаш политиклени тюбешиулери болгъанды. Анга 120-дан артыкъ адам къатышханды. Аланы асламысы  жаш тёлю биригиулени башчыларыдыла. Аланы араларында  Жаш тёлю парламентни бла Жаш тёлю правительствону, политика партияланы бёлюмлерини келечилери, жер-жерли самоуправление советлени специалистлери да болгъандыла. Бу  проект  «Территория смыслов» битеуроссей жаш тёлю форумда хорлагъанды. Аны  автору уа Герийланы Зухурады.

 Кенгеш  Россей Федерацияны  жаш инсанларын айырыулагъа   сейирлерин къозгъауду,  социал жаны бла жууаплы болургъа юйретиудю эмда   социал проектни жашауда бардырырча этер муратда къуралгъанды. Аны ишине  КъМР-ни Парламентини  Билим бериу, илму эмда жаш тёлюню ишлери жаны бла комитетини председатели  Нина Емузова,  жарыкъландырыу, илму эмда жаш тёлюню ишлери жаны бла министрни къуллугъун толтургъан  Ауес Кумыков, «Къабарты-Малкъарны  профсоюз организацияларыны биригиую" союзну таматасы Фатимат Амшокова, КъМР-ни Жарыкъландырыу, илму эмда жаш тёлюню ишлери жаны бла министерствосуну Кёп функциялы жаш тёлю арасыны директору Саида Жанимова къатышхандыла.

Тюбешиуню башлай, Нина Емузова, жаш адамлагъа айланып:"Биз, бусагъатдагъы оноучула, сизге не жаны бла да болушлукъ этерге хазырбыз,  алай сиз да  къыралда, республикада бола тургъан ишлеге  бир жанындан къараучуладан болмагъыз, къолугъуздан келгенни аямазгъа керексиз", -деп, насийхат этгенди. 

Ол политиканы бла властьны араларында  къаллай башхалыкъ болгъанын да ангылатханды, жаш адамланы араларында  бардырылгъан сорууну эсеплери бла да шагъырейлендиргенди. Политикагъа къатышыргъа сюебиз деп  сорулгъанланы жаланда 37 проценти айтханды, къалгъан 63 проценти уа анга эс бурмагъанларын  чертгендиле. Аны юсюнден оюмун билдире, Нина Гузеровна  жаш адамла   алай сансыз болсала, политика властьны къолгъа  бек терк аллыгъын эсгертгенди.  «Аны уа бир игилиги жокъду. Власть кесини борчун толтуралмагъан къыраллада политикле оноу этерге кюрешгенлерин да билебиз. Аны унутмагъыз»,-дегенди.

 Ауес Кумыковха жумуш бла кетерге тюшгени ючюн,  Саида Жанимова  министрни атындан   жаш адамланы бир къауумуна КъМР-ни Жарыкъландырыу, илму эмда жаш тёлюню ишлери жаны бла министерствосуну бюсюреу къагъытларын бергенди.  Ыспасха тийишли болгъанланы араларында  Созайланы Фидельни жашы Кязим да барды.
 

Тюбешиуню кезиуюнде  айырыулагъа жораланнган билим бериу семинарла да болгъандыла. Аланы КъМР-ни Айырыу комиссиясыны председателини  орунбасары Жаппуланы Мусса, Шимал Кавказны  бийик окъуу юйлерини ассоциациясыны студентлерини таматасы Азамат Люев,  КъМКъУ-да  жаш тёлю политика эм юйретиу иш жаны бла  управленияны таматасыны орунбасары Хажмухамед Этуев бардыргъандыла.
 

Тюбешиуню программасы не жаны бла да бай эм сейирлик эди. Анга кёре «Инсан. Айырыула. Власть», «Проектле бла ишлеу жаш тёлюню шёндюгю экономика болумгъа кесин жарашдырыуну амалыча» деген темала сюзюлгендиле.