Электрокюч ючюн борчлагъа къошула барады

Къабарты-Малкъарда жашау журт-коммунал мюлк предприятияланы  хайырланылгъан ток ючюн борчлары 1,62 миллиард сомгъа жетеди. Ол  былтыр бла тенглешдиргенде, 18 процентден кёпдю, деп билдириледи  «МРСК Северного Кавказа» компанияны пресс-службасындан. 

Бюгюнлюкде аслам берликлери болгъанлагъа  «Нальчикская теплоснабжающая компания» бла «Водоканал»  предприятияла саналадыла.  Жылны аллында окъуна ала «Каббалкэнерго» компаниягъа  608,2 миллион сом  тёлерге керек эдиле. Ол а былтырдан эсе  1,7 кереге кёпдю.  

Суд  сагъынылгъан предприятияланы ток ызладан кесерге эркин  этмегени себепли  ала бюгюн-бюгече да  тёлерге ашыкъмайдыла. Аны бла бирге борчлары уа кюн сайын  жыйылгъанлай барады.  Ала, ток бла жалчытхан организациягъа къоранчла келтиргенлеринден тышында,  бирси   хайырланыучуланы  да  алдайдыла.   

 «МРСК Северного Кавказа» компания токну чыбыкъла бла   0,4 - 110 киловатт кюч бла   жибереди. Инфраструктурагъа тийишлисича ишлерине къарайды, ремонт, жангыртыу дегенча  жумушланы  тамамлайды эм абонентлеге ток тартыргъа да болушады.  

 

Курданланы Сулейман
Поделиться: