Жыйырма жылдан сора да эллилени эсинде къалгъанды

Огъары Чегем элни жигит уланларындан бири Баштакъланы Гитчени жашы Юсюп  ауушханлы жыйырма жылдан да артыкъ озгъанды, алай ветеранны жарыкъ сыфаты  бюгюн да кёплени эслериндеди.  Ёсюп келген тёлю уа аны жигитлигини юсюнден элде Ата журтубузну къоруулаучуларына салыннган эсгертмеден билирге онглары барды.

Уллу Ата журтну аулакъларына тюшгенде, Юсюп жаш адам эди. Ол 1941 жылны аягъында къуралып башлагъан 115-чи атлы аскер дивизиягъа къуллукъ этерге чакъырылады. Анга бу дивизияны аскерчилерини жарсыулу къадарларын кеси боюнунда сынаргъа тюшеди. Ушкокла бла къамадан башха сауутлары болмагъан атлы аскерчилеге уа  танкла, самолётла, топла бла жалчытылыннган немислилени алгъа барыуларын тохтатыргъа борч салыннган  эди.

Баштакъланы Юсюп жигит, буйрукъгъа кертичи, тутхан ишин ахырына жетдирген аскерчи болгъанды.  Ол бу шартларын артда, Сталинград ючюн къазауатда да кёргюзтгенди. Немисли фельдмаршал Паулюс жесирге тюшген, аны алтынчы аскери ууатылгъан кезиуге дери жигитча сермешгенди. Алай къазауатда алгъан ауур жаралары урушну андан ары бардырыргъа онг бермейдиле. Таджикистанда саулугъуна бакъдыргъандан сора, Юсюпню андан ары уруш этерге жарамагъанын белгилеп, 1943 жылда аны юйюне ашырадыла.

Къазауатда этген жигитлиги ючюн Баштакъланы Юсюп  Ата журт урушну орденини 1-чи эм 2-чи даражаларына,  ол аскерчилеге берилген бек сыйлы Къызыл Байракъны орденине да тийишли кёрюлгенди. Аладан сора да,  «Кавказны къоруулагъаны ючюн», «Сталинградны къоруулагъаны ючюн» эмда «Германияда хорлам ючюн» майдаллада да  жасагъандыла ветеранны кёкюрегин.

Ата журтха къайтхандан сора, Юсюп  туугъан элини душман чачхан мюлкюн аягъы юсюне этиуге тири къошулады. Эл советни секретары болуп ишлегенди. 1944 жылда уа ол бир тюрлю терслиги болмагъан таулу халкъ бла  Орта Азиягъа кёчюрюлюп, 13 жылны киши жеринде жашагъанды.

Миллет  туугъан журтуна къайтарылгъандан сора, ол Огъары Чегемни айнытыу, аны мюлкюн аягъы юсюне этиу ишни жангыдан башлайды. Юсюп Гитчеевич Эл советни секретары болады, пенсиягъа чыкъгъандан сора уа ветеран организацияны ишин къураугъа уллу къошумчулукъ этгенди. Ол ахыр кюнюне дери  аны башчысы болуп тургъанды.

Мамыр жашауда да Баштакъланы Юсюп къырал саугъалагъа тийишли кёрюлгенди. Ол «1941-1945 жыллада Уллу Ата журт урушда жигер уруннганы ючюн», «Жигер уруннганы ючюн. В.И.Ленин туугъанлы – 100 жыл» эмда «Урунууну ветераны» деген майдалла бла саугъаланнган эди.