Сакълыкъгъа гитчеликден тюшюндюре

Келе тургъан Жангы  жылгъа жоралап, Къабарты-Малкъарда  от тюшюуге къажау-къутхарыу  службада къуллукъ этгенле сабийлеге  уллу байрам къурагъандыла. Анга Нальчикде  25-чи номерли "Золотой орешек"  сабий садха жюрюген къызчыкъланы бла жашчыкъланы чакъыргъандыла. Ол кюн байрамны КъМР-ни Парламентини депутатлары Борис Паштов бла  Мурадин Карданов, юйретиучюле, ата- анала да жокълагъандыла.

Къонакъланы  от тюшюуге къажау- къутхарыу службаны таматасы Анзор Карданов келе тургъан Жангы жыл бла алгъышлагъандан сора,гитче  къонакълагъа  сюйген  жомакъларын кёргюзтгендиле. Ызы бла уа Къар аппа  келгенди. Ол сабийлеге  назы терекни жасагъанда, от тюшмезча къаллай мадарла этерге кереклисини юсюнден оюн халда билдиргенди, аладан да  жорукъланы билгенлерин бла къалгъанларын соргъанды.

Андан сора Россельхозбанк  бла "Жако"  кондитер фабрика хазырлагъан саугъала юлешиннгендиле. От ёчюлтюучюле  уа"01" деген жазыуу бла хар къызчыкъгъа бла жашчыкъгъа къызыл шарла бергендиле.

-Быллай ишле сабийлени гитче заманларындан окъуна да сакълыкъгъа юйретирге,  байрамла  уа бушуугъа айланмазларына себеплик этедиле. Бу балачыкъла, кесигиз кёргенликден, от тюшюуге къажау жорукъланы  биледиле. Ала юйлеринде да сакъ боллукъдула. Биз жангыз муну бла тохтап къаллыкъ тюйюлбюз. Школлада, сабий садлада да ётдюрлюкбюз быллай байрамланы. Бизни бу ишибизге  Россельхозбанк бла "Жако" уллу болушлукъ этедиле да, алагъа жюрек ыразылыгъымы билдиреме, -дегенди   Анзор Карданов.