Къагъыт ахчаланы тарыхы эм магъанасы

Россейде биринчи къагъыт ахчала жюрюп башланнганлы 250 жыл толгъанына жораланнган кёрмюч бу кюнледе Нальчикде Музыка театрда бардырылады. Анда суратлада башха-башха жыллада жюрюген ахчалада  къыралыбызны финансла бла байламлы тарыхын кёрюрге боллукъду, деп билдиргендиле РФ-ни Банкыны КъМР-де бёлюмюнден.

«Къагъыт ахчала Россейде 1769 жылда 9 январьда чыкъгъандыла. Андан бери ала белгили политика эмда тарых магъаналы ишлени къайсылары бла да байламлы болгъандыла. Хар быллай кезиу аланы юслеринде кесини энчи белгисин къойгъанды. Ма мында ала барысы да кёрюнюп турадыла», - дегенди бёлюмню башчысыны орунбасары Балаланы Расул.

Дагъыда ол айтханнга кёре, кёрмючге келгенле анда ахчаланы суратлагъан усталаны, ал жыллада хайырланылгъан полиграфия технологияланы  юслеринден толуракъ билликдиле.

Кёрмюч жууукъ кезиуде А. Шогенцуков атлы Къабарты театргъа кёчерикди.