Республиканы предприятияларыны продукциясы - Абу-Дабиде

Талай кюн алгъа Бирлешген Араплы Эмиратланы (ОАЭ) ара шахары Абу-Дабиде аш-азыкъланы эмда суусап сууланы SIAL Middle East 2019 деген кёрмючю болгъанды. Анга 50 къыралдан мингден артыкъ компания къатышханды. Къабарты-Малкъардан а продукцияларын (гара эм жемиш суула) «Живая вода», «Фрукт-Трейд» предприятияла бла «Перспектива» эл мюлк кооператив кёргюзтгендиле, деп билдиргендиле КъМР-ни Экономиканы айнытыу министерствосундан.

Бу кёрмючде жыл сайын бир миллиард долларгъа келишимле этилиучюдюле. Ол себепден аны магъанасы бек уллуду, бизден баргъан предприятиялагъа жангы рыноклагъа чыгъаргъа, продукциялары бла кёплени шагъырейлендирирге уллу онгла ачыладыла. Алагъа аллай даражалы кёрмючге къатышыргъа республиканы Предпринимательствогъа себеплик этиу жаны бла арасы эм Экономиканы айнытыу министерствосу болушхандыла.  

 

Улбашланы Мурат.
Поделиться: