Биринчи болушлукъ бераллыкъдыла

Бу кюнледе Къабарты-Малкъар къырал аграр университетде КъМР-де  чекленнген жууаплылыгъы болгъан   "Къызыл Жор" регион бёлюм къурап студентлеге деп  информация-жарыкъландырыу иш бардырылгъанды.

Аны баш магъаналы борчлары - жаш адамланы халкъла аралы гуманитар право бла шагъырейлендириудю, дунияны башында "Къызыл Жорну" ишини юсюнден билдириудю, анга студентле не къадар кёп къатышырча этиу эм дагъыда жаш адамланы  къыйын болумлада кеслерин къалай жюрютюрге кереклисине юйретиудю,  ол ишни "Биринчи болушлукъ этиу" деген  программаны да  къошуп бардырыуду.

Эришиулеге алты команда къатышханды: "Экономистле", "Волонтёрла", "Чики-Брики", "Агро", "Къызыл жилян" эм "Крик души" .  Ала  "Къызыл Жордан" соруулагъа жууапла бергендиле, "Пазл-квест", "Къызыл Жорну белгиси бла аны амаллары", "Плакат-квест", "Биринчи болушлукъ этиу", "Жашаугъа къоркъуулу жолла", "Белгиле" деген оюнлада кеслерин сынагъандыла.

Бек игиге "Экономисты" команда саналгъанды, экинчи жерге "Волонтёрла" чыкъгъандыла, ючюнчю уа "Къызыл жилян" деген командагъа жетгенди.

Квестде хорлагъанла  дипломла эм багъалы саугъала  къоллу болгъандыла. Оюннга къатышханланы барына да  сертификатла берилгендиле.