Къолларынг ариу болурун сюе эсенг

Къолланы териси суудан бузулмаз ючюн косметологла резин къол къапла кийигиз дейдиле.  Алай ары дери къолланы тынгылы жуууп, къурутуп, аз-маз тальк себерге тийишлиди. Быстыр, адыр, пол жуууп бошагъаныгъыздан сора уа къолларыгъызны  къол къапланы тешмей тургъанлай жууугъуз, ызы бла аланы тешип,  ичлерин чайкъагъыз, сора, къурутуп, эки жанындан да тальк себип  салыгъыз. Къол къапланы тешгенден сора, къолларыгъызны да жылы сууда  жууаргъа, ала къургъакъсыгъандан сора уа крем жагъаргъа керекди.

 х х х

Кремни терк-терк жагъа турсагъыз, къолларыгъызны териси жумушакъ да, ариу да болады. Аны хар жуугъаныгъыз сайын, бютюнда кече, жагъаргъа керекди. Аны аллында уа къолланы  жылы суу, сапын бла тынгылы жууаргъа тийишлиди. Кремни  алгъа бармакъладан башлап  жагъаргъа керекди.

 Х х х 

Къолланы териси къургъакъ болуп жарыла эсе, анга жаулу чулгъам болушурукъду. Къолланы жылы сууда жуууп, жылы жауда жибитилген салфеткагъа  чёргеп,  къол къапла киедиле. Къол къапла мамукъдан, жюнден этилгенле болургъа керекдиле, синтетикалыла  арталлыда жарамайдыла. Бир, бир бла жарым сагъатдан  къолладан салфеткаланы кетередиле, къалгъан жауну къагъыт неда фланель журунчукъ бла сыйпайдыла. Алай этгенден сора къолланы жууаргъа керек тюйюлдю.     

х х х 

Къолланы  териси жыйырылгъан эсе,  жумуртханы сарысын бла бир уллу къашыкъ  балны бирге къатышдырып, аны ингирде жагъаргъа керекди. Дагъыда ромашканы, шалфейни, жёгени гюлюн бирге къошуп жарашдырылгъан суу  да жарайды. Бир адыргъа ол хансла къайнагъан сууну къуюп, 10-15 минутха къолланы ары саладыла, ызы бла аланы жумушакъ жан жаулукъ неда къагъыт салфетка бла къурутуп, жаулу крем жагъыгъыз.

Дагъыда сельдерей суу да хайырлыды, бек  уллу болмагъан тамырны 30 минутну ичинде бир литр сууда къайнатадыла. Картоф крахмал да жарайды. Бек  алгъа бир стакан исси сууда  бир чай  къашыкъ крахмалны къайнатып, ызы бла  аны бир литр жылы суу бла къатышдырадыла.

 х х х 

Къолланы терисин жумушатыргъа глицерин бла нашатыр спирт  къошулгъан ванначыкъла да болушадыла. Эки литр жылы суугъа бир уллу къашыкъ глицерин бла бир чай къашыкъ нашатыр спирт къошадыла.
Наша туурамчыкъла неда картоф  бишген суу да иги амалгъа саналадыла. Бахчада  ишлегенден сора къаралгъан къолланы бал туз къошулгъан сапын сууда жуусагъыз, ала агъарадыла.

хх х 

Аяздан къолланы териси  бузулду эсе, алагъа бишген картофну жабышдырса хайырлыды. Къабугъу бла бишген эки картофну алып, аны эки чай къашыкъ лимон неда  наша сок бла къатышдырадыла, жылылай къоллагъа къалын  жагъып, юсюн целлофан бла жабадыла, 15-20 минутдан  жуууп кетередиле эмда крем жагъадыла.

ххх 

Къолла бек терлей эселе, акъ талны къабугъу  жарайды. Ууакъ тууралгъан эки чай къашыкъ къабукъгъа тёрт стакан къайнар суу къуюп, 15-20 минутну турма къоядыла, ызы бла сюзюп, сууутуп, анга къолланы саладыла. 
Эменни къабугъу да хайырлыды. Бек гитче тууралгъан элли грамм къабукъну бир литр исси суугъа къуюп, отуз минутну къайнатадыла, ызы бла сюзюп, сыра бетли болгъунчу суу къошадыла. Къолланы аллай сууда тутхандан сора аланы къурутуп, къол аязлагъа борный  кислотаны  бла талькны бирге къатышдырып ышыйдыла.
                                         

х х х 

Гимнастиканы да унутмагъыз. Аны бек къыйын болмагъан бир ненчасын айтайыкъ. Бу затланы эрттенликде неда бош заманыгъызда этерге боллукъсуз:

1. Къол бармакъланы бирге тыншчыкъ  къысып, ызы бла ачыгъыз.

2. Эки  къолугъуз бла столгъа тирелигиз. Сора, столдан айырмай, къолугъуздан келгенича, хар бармакъны ёрге кётюрюп, ызы бла энишге жиберигиз. Энди  уа бармакъла бла столгъа тиймей тюз алай этигиз. Бу упражненияны эте туруп, бармакъланы къыйырлары бла столну къаты урургъа кюрешигиз.

3. Жингириклени столгъа салып, эки къол аязны бирге къошаргъа кюрешигиз. Ызы бла, бармакъланы бир бирге къаты тиреп, къол аязланы бир бирден айырыгъыз.

4. Жингириклени столгъа салыгъыз. Къолланы тёгерек буругъуз.

5. Къолланы  ёрге кётюрюп, аланы артха бла алгъа бюге, тёгерек буругъуз.