Жаш тёлюге конкуренцияны къорууларча

Россей Федерацияда хар жыл сайын 3 декабрьде юристни Кюню белгилегенди. Аны чеклеринде Монополиялагъа къажау службаны КъМР-де управлениясыны башчысыны орунбасары Анна Кумахова эм алчы специалист-эксперт Созайланы Рашид Нальчикде орта школлада конкуренцияны къоруулауну юсюнден ачыкъ дерсле бардыргъандыла, деп билдиргендиле ведомстводан.

Дерслени кезиуюнде «юрист деген ол кимди?», «къырал службада юридический билимни къалай хайырланыргъа боллукъду?», «Монополиялагъа къажау служба къырал власть органланы системасында», «мен «антимонопольщикге» барыр эдим, аны ючюн не зат этерге керекди?», «конкуренция деген ол неди?» эм башха соруула сюзюлгендиле. Къонакъла школчулагъа 1864 жылда 3 декабрьде къыралда сюд реформаны мурдорун къурагъан талай сюд уставла эм башха законодательный актла къабыл этилгенлерин билдиргендиле. Россейде правоведле кеслерини профессионал байрамларын 1917 жылгъа дери ол кюн белгилеп тургъандыла. РФ-ни Президентини буйругъу бла аны жангыдан 2008 жылда белгилеп тебирегендиле.

Анна Кумахова окъуучулагъа юрист усталыкъны, ол къачан къуралгъаныны юсюнден кёп сейирлик шартла айтханды: Буруннгулу Римден эмда Терен акъыллы Ярославны «Орус тюзлюгюнден» башлап, конкуренция эм реклама сфералада шёндюгю законлагъа дери. Рекламаны юсюнден сагъыннганда, жаш адамла терс рекламаны кеси кёзлери бла кёп кере кёргенлерин билдиргендиле.

Созайланы Рашид а ведомствону юсюнден хапарлагъанды, ол ары къалай келгенин, ишде анга насийхатчы болушуп тургъанын да билдиргенди. «Билим алыу школ бла бирге бошалмайды. Адам къайсы ишде, усталыкъда да аны андан ары кючлендиргенлей турады», - дегенди ол.
Ахырында Управленияны келечилери школчулагъа жетишимле, келир экзаменлени да иги белгиле бла берирлерин тежегендиле.