Къарыусузну, саусузну жашауун женгиллетир ючюн, сиз не амал этерик эдигиз?

Инвалидлени халкъла аралы кюнюне жораланып, Россейни  кёп жерлеринде, ол санда Къабарты-Малкъарда да,  "Доступная среда"  акция бардырылгъанды. Ол  Къабарты-Малкъар къырал университетни "Точка кипения" залында ётгенди. Анга республиканы хазна къалмай битеу районларындан юч жюзден аслам адам  къатышханды.
     

 Тюбешиуню башлай, КъМР-ни урунуу эмда социал къоруулау министрини орунбасары, коммерциялы болмагъан  "Единая страна, доступная среда" проектни координатору  Елена Романова  инвалидлеге болушлукъ дайым эмда хар жерде да керек болгъанын эсгертгенди. «Бу проект, мен оюм этгенден, инсанларыбызны  эслерин  кесине бурлукъду эмда мындан ары болушлукъ керек болгъанлагъа къайгъырыулукъ, тутхучлулукъ бютюн кючлениригине ийнанама»,-дегенди. 
 

  Нальчикде  сокъурланы  ара библиотекасыны директору Жанна Хамдохова  уа  "Доступная среда" программа бизни республикада къалай тамамланылгъаныны юсюнден билдиргенди. "Мен маданият жаны бла ишлегеним себепли  аны  махкемелерини юсюнден айтырыкъма. Ала барысы да  программагъа тири къатышхандыла. Сёз ючюн, бизни библиотеканы юсюнден айтханда, ол битеу керекли затла бла жалчытылыныпды. Сёз былайда жаланда арбачыкълада жюрюгенлеге жолчукъла къурауну юсюнден бармайды. Кёзлери кёрмегенле китап окъурча амалланы юсюнден да айтама. "Сара" машинабыз, видеону уллу этип кёргюзтген эм навигация приборларыбыз, дагъыда кёп башха затларыбыз  бардыла»,-деп, ол бюгюннгю  жыйылыу санларындан къыяулула да жамауатны  арасында  кеслерин эркин эм базыныулу  жюрютюрча онгла къураугъа себеплик этер деп ышаннганын билдиргенди.
 

  «Доступная среда»  академияны  кафедрасыны аналитиги Алина  Накова бу къошакъ профессионал билим берген учрежденияда  Россейни Президентини грантына тийишлиликде Саулукъну сакъларгъа юйретиуню арасы къуралгъанын белгилегенди. 

 Акцияны чеклеринде  соруула бардырылгъандыла. Ала инвалидлени  жашау болумларын женгиллетиуге жораланнгандыла. Алагъа жууапла бергенлени араларында уа  студентле, аш-суу,  халкъны жумушларын жалчытыуда,  медицинада, маданиятда, искусствода  ишлегенле, толтуруучу власть, регион, муниципал органланы келечилери, шахарлада, элледе жашагъанла бар эдиле.
 

    Волонтёрла соруула жазылгъан къагъытланы  юлешгенден сора аланы алгъанла олсагъат жууапларын хазырлап башлагъандыла. Ол ишге  бир сагъатха жууукъ заман кетгенди. Соруула инвалидлени  жашау болумларын женгиллетиуге жораланып эдиле. Аны юсюнден кеслерини оюмларын айтханланы араларында уа  студентле, аш-суу,  халкъны жумушларын жалчытыуда,  медицинада, маданиятда, искусствода  ишлегенле, толтуруучу власть, регион, муниципал органланы келечилери, шахарлада, элледе жашагъанла бар эдиле.
 

   Тестирование тюзюнлей эфирде кёргюзтюлгени себепли залда уллу экранда  Москвада энчи сабийле къурагъан концерт да кёргюзтюлгенди. Ара шахардан экспертле уа эсеплени чыгъарыугъа киришгендиле. Тюбешиуню ахырында уа мастер-классла да болгъандыла.
 

 

Холаланы Марзият.
Поделиться: