Сабийлени бузукълукълары ючюн – ата-аналагъа тазир салыргъа

    Жолда жюрюуню къоркъусузлугъуну жорукъларын бузгъан сабийлени ата-аналарын жууапха тартыргъа боллукъдула. Быллай сынауну Москвада бардырыргъа мурат этиледи. Бу башламчылыкъны сылтауу - оналты жыллары толмагъанланы араларында бузукълукъ этгенле аз да жууапха тартылмагъанларындады. Алагъа акъылбалыкъ болгъунчу тазир салгъан угъай, административ бузукълукълада окъуна терслерге къыйынды. Эркинликсиз мотоциклге олтурургъа, авария этерге, адамланы ачытыргъа алагъа жарайды, алай законнга кёре келтирген заранлары ючюн а жууап тутаргъа уа - угъай.

  Балаларын тюз юйретиу – абаданланы  биринчи борчларыды. Алай ала аны хар заманда да эслеринде тутмагъанчады. Сёз ючюн, былтыр оналтыжыллыкъ мотоциклист, Нальчикде светофорну къызыл жаннганына тохтамай кетгенди да, башха машина бла къагъышханды. Жаш, саулугъуна чып тюшюп, больницада ёлген эди. Ары дери да жолда бузукълукъ этгени ючюн аны кёп кере тыйгъандыла. Аны ючюн аны анасына 5000 минг сом тазир да салыннган эди, алай ол мадар да болушмагъанды. 

    Шахарны автоинспекциясы жолда ачыгъанланы саны ёсгени ючюн аварияланы азайтырча мадарла этерге кюрешеди. Алай жангыз да акъылбалыкъ болмагъанланы тутуу бла чеклениу халны не хазна тюзетсин. Аны ючюн ата-аналаны сабийлерини «хылилери» ючюн жууапха тартыргъа аслам тюшеди, дейдиле ГИБДД-да. 

    Жол-патруль службаны инспекторлары аланы бузукълукъларын ачыкълагъанда скутерлерин сыйырыргъа, аланы энчи стоянкалада къояргъа, сабийлени полицияны жер-жерли бёлюмлерине элтирге, аланы юсюнден Акъылбалыкъ болмагъанланы ишлери жаны бла комиссиягъа билдирирге эркиндиле.

 Юйретиу борчларына уллу кёллюлюк этген ата-анала, административ жууаплылыкъгъа тартылгъандан сора да, отуз мингнге дери штраф тёлерге керек боллукъдула. Сёз ючюн, скутерге кеф болуп тургъанлай миннгени ючюн тазир 5-15 мингнге дери жетеди, деп эсгертедиле КъМР-де МВД-ны ГИБДД-сындан.

Басмагъа Кульчаланы Зульфия хазырлагъанды.
Поделиться: