Наркоманиягъа къажау кюреш бютюн къыйматлы болур кючню бирикдирирге керекди

КъМР-де УФСИН-ни уголовный-толтуруучу инспекциясында къуллукъ этгенле Къабарты-Малкъарда Ич ишле министерствосуну кенгешине къатышхандыла. Анда «Россейни сабийлери-2019» оператив-профилактика операцияны эсеплери чыгъарылгъандыла. Кеслерини отчётлары бла УФСИН-ни жер-жерли органыны, КъМР-де МВД-ны эмда саулукъ сакълауну бла жарыкъландырыуну министерстволарыны ишчилери сёлешгендиле.

Ала кёргюзтген шартлагъа кёре,  полициячыла башхала бла бирге 54 рейд бардыргъандыла,  акъылбалыкъ болмагъанладан ючеулен бузукълукъла этгенлерин ачыкълап, аланы эсепге салдыргъандыла, 168 административ материал да жарашдырылгъанды, ол санда сабийлерине тийишлисича къарамагъан ата-аналагъа да. Наркотиклени, адамны башын хайран этген башха затланы чыгъаргъанлары, асырагъанлары, сатып алгъанлары, жарашдыргъанлары ючюн  8 уголовный иш ачылгъанды, наркотиклери болгъан затладан 600 граммы сыйырылгъанды.

КъМР-ни Жарыкъландырыу, илму эмда жаш тёлюню ишлери жаны бла министерствосу да республиканы билим бериу  махкемелеринде акцияны эки кезиуюн бардыргъанды. Анга талай ведомствода къатышханды. Наркотиклеге къажау бурулгъан 302 иш бардырылгъанды, ол санда саулукъну дерслери, «тёгерек столла», класс сагъатла. Алада 7 мингден аслам адам болгъанды.
Наркоконтрольну республикалы управлениясында, Кинолог службаны арасында, акъылбалыкъ болмагъанланы ишлери жаны бла бёлюмледе ишлегенле эмда полицияны участковый инспекторлары Саулукъ сакълауну министерствосуну келечилери бла бирге адамланы солугъан кезиулерин къурагъан 70 учрежденияны, ол санда барланы бла интернет салонланы , акъылбалыкъ болмагъанла кёп жыйылыучу 132 жерни тинтгендиле эмда  ючеуленни наркотик затланы хайырланнганларын, экеулен а юйлеринден къачып айланнганларын ачыкълагъандыла.

Республикалы МВД-ны бла УФСИН-ни келечилери бардыргъан рейдлени кезиулеринде уа сабийлеге зорлукъ этилген, ата-анала балаларын юйретиу жаны бла борчларын тийишлисича толтурмагъан шартла ачыкъланнгандыла, сюд этилип тургъан  аталары, аналары неда бир башха жууукълары акъылбалыкъ болмагъан сабийлени биргелерине жашап тургъан 93 юйюрню тинтгендиле. Аланы хар бирине тюзетиу  мадарланы планы жарашдырылгъанды, сабийле, ата-анала бла ушакъла бардырылгъандыла, законла ангылатылгъандыла.

Наркотикле, адамны башын хайран этген башха затла болурламы, къалырламы деген мурат бла т 18 транспорт объект да тинтилгенди. Андан сора да, тюкенледен 200-ден артыгъы, 13 рынок да къармалгъандыла.  Ведомствола аралы комиссиягъа къатышханла акъылбалыкъ болмагъанла кече-кюн да тургъан 15 учрежденияны эмда 185 жашау юйню да жокълагъандыла.

КъМР-де МВД-ны Наркоконтроль управлениясыны таматасы полицияны полковниги Виталий Дударов,  битеу бардырылгъан ишле магъаналы болгъанларын чертип, ведомствола аралы къауумну  наркоманиягъа къажау кюреш бютюн къыйматлы болур ючюн битеу кючню бирикдирирге чакъыргъанды.