Окъуучуланы финанс политика бла шагъырейлендириу

Алгъаракъда Къабарты-Малкъар къырал аграр университетде, Бухгалтерни кюнюне жораланып, Россейни Банкыны Къабарты-Малкъарда бёлюмюню келечилери бла тюбешиу болгъанды. Анга вузну преподавательлери, студентле да къатышхандыла, деп билдиргендиле КъМКъАУ-ну пресс-службасындан.

Банкны экономика бёлюмюню таматасы Аслан Медалиев финанс учрежденияны ишини, борчларыны, быллай тюбешиуледе студентлеге нени хапарлагъанларыны юсюнден билдиргенди. Ызы бла аны специалисти Людмила Зухова «Россейни Банкыны кредит-ахча политикасы» темагъа лекция окъугъанды. Анда бу политика къыралны ичинде финанс сфераны къалай тюрлендириучюсюню, адамланы къолайлыкъларын игилендирирча не мадар этилгенини юсюнден айтыла эди. Студентле анга бек уллу эс буруп тынгылагъандыла.

Жыйылыуну ахырында университетни келечиси Фатима Татуева быллай тюбешиуле вузда тийишли специалистлени хазырлагъанда, студентлени финансла жаны бла билимлерин кючлендиргенде да бийик магъананы тутадыла, дёп чертгенди эмда къонакълагъа ыразылыгъын билдиргенди.