Май районда ток сетьле «Россети Шимал Кавказ» къырал холдингге киргендиле

Май районну электросетьлери жууукъ кезиуде «Россети Шимал Кавказ»

компанияны бойсунуууна кёчерикдиле. Бу кюнледе аны эм муниципалитетни арасында тийишли келишим этилгенди, деп билдиргендиле «Каббалкэнерго» компанияны пресс-службасындан.

 

Эсге сала айтсакъ, Шимал Кавказда электросетевой мюлкню «Россети» къырал холдингге кёчюрюу иш РФ-ни Правительствосуну оноуу бла бардырылып тебирегенди. Аны хайыры бла ток бла жалчытыуда кёп чурумладан къутулургъа боллукъду.  Россейни Президенти Владимир Путин айтханнга кёре, холдингге кирмеген жер-жерли сетьлени асламысы объектлерине тийишлисича къараялмайдыла, регионлада предприятияланы, адамланы да ток бла ышаннгылы жалчыталмайдыла.

 

Шёндюледе Нальчикде сетьлени да ол компаниягъа бериу бла байламлы иш барады. «Каббалкэнергону» башчысы Муртаз Каров айтханнга кёре, бу инфраструктураны бир холдингде тийишдириу эрттеден бери жыйылып тургъан проблемаланы тындырыргъа, электрокюч мюлкню жумушларын тамамлаугъа къоранчланы да азайтыргъа амал берликди.

 

«Муниципал сетьлени «Россетиге» кёчюргенини хайырындан Май район ол мюлкню тийишли халда тутарча къоранчладан эркин этилгенди. Дагъыда иесиз болгъан энергообъектлени саны да азайырыкъды», - дегенди муниципалитетни башчысыны къуллугъун толтургъан Татьяна Саенко. Къырал холдингни регионда бёлюмюню специалистлери районда электрокюч мюлкню ишин тынгылы къурарыкъдыла, муниципалитетни бюджетине уа къошакъ ахча тюшерикди.