«Мамырлыкъны ыйыгъында» - жаланда келишиулюк эм шуёхлукъ

Къабарты-Малкъар къырал аграр университетде "Мамырлыкъны ыйыгъы" деген проект жашауда бардырылгъанды.  Ол   Жаш тёлюню ишлери жаны бла федерал агентствону  грантына  къуралгъанды. Аны башламчысы Искусстволаны Шимал-Кавказ къырал институтуну  проректору Эфендиланы Фуадды. Проектни жашауда бардырыугъа Жаш тёлю ресурс ара, В.М.Коков атлы къырал аграр университет да  юлюшлерин къошхандыла. 

Анга кёре бир ненча айны ичинде бийик окъуу юйде  студентлени араларында  келишиулюкню, миллетлени бир бирлери бла байламлыкъларын кючлеуге бурулгъан бир ненча магъаналы иш бардырылгъанды.  Аланы эсеплери бу кюнледе  ётген  "тёгерек столда"  чыгъарылгъандыла. Анга КъМР-ни Парламентини Культура,  граждан обществону институтларын айнытыу эмда СМИ жаны бла  комитетини таматасы Борис Паштов, КъМКъАУ-ну бла СКГИИ-ни проректорлары Анзор Езаов бла  Эфендиланы Фуад эм башхала къатышхандыла.

Сюзюуню башлай,  проектни координатору, КъМКъАУ-ну  тарых эм философия кафедрасыны тамата преподаватели  Жаппуланы Лореанна  проектге кёре къаллай ишле  тамамланнганларыны юсюнден билдиргенди. 

Анзор Езаов  а   проектге къатышхан битеу командалагъа  ыспас этгенди. Ол республикада кёп миллетлени келечилери  ёмюрледен бери да  келишиулюкде, шуёхлукъда жашап келгенлерин айырып айтханды. Мындан ары да алай болуп келлигине ийнаннганын билдиргенди.

Аны сёзюн андан ары бардыра, Борис Паштов  Шимал Кавказда бизни республика миллетлени араларында  ачыкъ къаугъала чыкъмагъан жангыз болгъанын эсгертгенди.  «Кертиди, анда-санда  дауурла къозгъаргъа кюрешгенле да бардыла, ала асламысында тарых шартланы сылтаугъа тутадыла.  Алай аланы сансыз этерге жарарыкъ тюйюлдю, аллай гитче затладан   уллу от жанып  къалыргъа боллугъун  эсге алыргъа керекди.  Ма быллай проектле аны ючюн магъаналыдыла. Жаш адамлагъа  тюзню бла терсни ангылатыу бизни барыбызны да борчубузду»,-дегенди ол.

Эфендиланы Фуад а Борис Паштов  "Патриот" эмда "Къонакъбайлыкъ"  проектлени башламчысы болгъанын айтып, анга ыспас этгенди. 

СКГИИ-ни  кафедрасыны таматасы,  культурология илмуланы  кандидаты, КъМР-ни билим бериуюню  сыйлы къуллукъчусу Людмила Шауцукова бурун заманланы эсге салгъанды. «Платонну кезиуюнде окъуна не тюрлю даулашланы да стол артында сюзгендиле.  Мен жаш адамла бла ишлегеним себепли, аланы араларында  бир затха сейирлери болмагъанла да тюбегенлерин кёрюп турама. Алагъа айтырыгъым: бюгюн сизге жыйырма жыл болады, дагъыда аллай бир жылдан  а  къыралгъа, республикагъа да башчылыкъны сизни тёлюгюз этерикди. Анга тийишли болургъа керексиз»,- дегенди ол.

КъМКъАУ-ну тарых эм философия кафедрасыны профессору   Кучукланы Магомет  токъсанынчы жылланы эсге салгъанды. Ол заманлада бола тургъан ишлени къайтармаз ючюн,  ёсюп келген тёлюге бютюн сакъ болургъа, аны юйретиуню къолгъа къаты алыргъа кереклисин чертгенди. Ол дагъыда  21  ноябрь  Философияны кюню болгъанын, аны кёп къыраллада белгилегенлерин да билдиргенди. «Аны айта келгеним, Санкт-Петербургда  юч кюнню ичинде  54 иш бардырылгъанды. Аланы барысы да философияны юсю бла миллетлени араларында байламлыкъланы кючлендириуге жораланнгандыла»,-дегенди  профессор. 

Тарых эм философия кафедраны  преподаватели, профессор Али Дадашев   Къабарты-Малкъарда жашагъан азербайджанлыланы маданият араларына башчылыкъ этеди. Ол башха миллет  биригиуле бла бирге  тюрлю-тюрлю байрамла,  ингирле къурагъанларын, ала  не заманда да сейирлик ётгенлерин билдиргенди.  «Ма аллай тюбешиуле тюрлю-тюрлю миллетли адамланы, башха-башха динлени тутханланы бютюн  жууукълашдырадыла»,-деп чертгенди. 

Ызы бла 1-чи, 2-чи курсланы студентлери  Заммаланы Лолита, Бахова Марьяна,   Баккуланы Фатимат,  Бёзюланы Лейля,  дагъыда башхала докладла этгендиле, алада  жаш тёлюню арасында бир бирни ангылаулукъ эм шуёхлукъ болур ючюн не этерге кереклисини юсюнден оюмларын билдиргендиле.