Солдатланы аналарыны жюреклери энди бир заманда да элгенмесинле

Сауутланнган кючлени  запасдагъы офицерлерини биригиулерини «Мегапир» миллет ассоциациясыны КъМР-де бёлюмю  Бахсан шахарда «Солдатны анасыны жюреги» деген патриот акцияны  бардыргъанды.  Анга сыйлы къонакълача Россейни Жигитлери Валерий Куков  бла  Абубакар Костоев чакъырылгъандыла.  

Акцияны башлай,«Мегапир» миллет ассоциацияны бёлюмюню таматасы  Атайланы Жашарбек   бюгюннгю иш Уллу Ата журт урушда  Хорламны  75-жыллыгъына жораланнганын, кеси да Краснодар крайны   Тимошевск шахарында тогъуз жашын да урушха ашыргъан анагъа ишленнген эсгертмени къатында башланнганын да  айтханды.

-Бизни республикада уа акция  биринчи кере бир жыл мындан алгъа  Кенжеде бардырылгъанды. Быйыл октябрьде  уа   Шалушкада ётгенди.  Энди бу  ахшы тёре Бахсан  шахаргъа  жетгенди. Мында бу акцияны къурагъанла  Бахсан райондан фронтха  кетип, андан къайтмай, белгисиз тас болгъанланы атларын тохташдырыу жаны бла уллу иш бардыргъандыла.  Ала ачыкълагъан шартла  тамашагъа къалдырадыла. Сёз ючюн, Ючюнчю  Къызбурунда жашагъан Пита Бештоевни юйюрюнден фронтха беш  жаш кетип, тёртюсю сермеш аулакълада къалгъандыла, бири уа белгисиз тас болгъанды. Солдатланы аналары Кука   тёрт ючгюл къара къагъыт алгъанды. Тас болгъан жашын а ана кесини ахыр кюнлерине дери  хар эрттен сайын жолгъа чыгъып сакълагъанды…

Сосруко Хежевни юйюрю уа беш жашларын фронтха ашырып, аладан бири да къайтмагъанды. Ата журтну эркинлиги ючюн жан бергендиле. Аналары Уляца да ахыр кюнюне дери жашлары къайтырларына ышанып тургъанды.

Нагоевланы юйюрлери  да фронтха беш жашларын  ашыргъандыла.  Солдатланы аналары  Кармахан эки жашын кёрмей ауушханды.

1941 жылны сентябрь айында  поэт, жазыучу Али Асхадович Шогенцуков да урушха кетгенди. Полтава областьны Лохвица станциясыны тийресинде  фронтха бара тургъан аскерчиледен толу эшелонну гитлерчиле,  самолётладан бомбала атып,  чач-тюк этгендиле. Сау къалгъанланы уа  тутхандыла. Шогенцуков Бобруйск шахарда концлагерьге тюшгенди. Ма анда поэтни, Ата журтну кертичи жашыны,  жашауу юзюлгенди.  Аны ызындан солдатны анасы  Ляца Асланбековна  фронтха дагъыда эки жашын ашыргъанды. Ала да  туугъан журтлары ючюн жан бергендиле.

Патриот акцияны къурау комитети солдатланы аналарыны туудукъларын излеп, аланы  акциягъа къатышыргъа чакъыргъанды. Аланы араларында  Хасан Бештоев, Хасан Хежев, Николай Закураев да бар эдиле. Аланы барына да  Россейни Жигити  Абубакар Костоев  маршал Д.Т Язовну атындан «Солдатны анасы» деген  майдал эмда  бюсюреу къагъытла бергенди.

Сатаней  Шогенова, Кураца Хашхожева, Дыша Тлупова,  Худаби Карданова,  дагъыда кёп башхала да фронтха тёртюшер, бешишер жашларын ашырып, аланы ахыр кюнлерине дери сакълап тургъандыла. Россейни Жигити Валерий Куков  башда  атлары айтылгъан аналаны туудукъларына  РФ-ни Къоруулау министерствосуну жамауат советини  председатели А.Н.Каньшинни атындан «Солдатны анасы» майдал бла  бюсюреу къагъытны бергенди.  

Афганистандагъы уруш да арт жыллада бола тургъан эм къанлы эди. Анда 14597 совет аскерчи жоюлгъанды. Аладан  54 Къабарты-Малкъардан баргъан жашла эдиле. 8 солдат бла офицер а - Бахсан райондан. Ма аланы аналары да чакъырылгъандыла.Залимат Карамурзовагъа,  Лилия Ныровагъа, Роза Хурановагъа Бахсан шахарны,  Бахсан эм Зольск районланы аскер комиссариаты Мухамед Сосналиев, Росейни Жигити Валерий Куков да  саугъала, майдалла, бюсюреу къагъытла да бергенди. Аллай  сыйгъа афган урушха къатышхан Владимир Абазов, Борис Асланов,  Арсений Кештов,  Алим Нанов эм Мухамед Шогенов да тийишли болгъандыла.

Тёреде болуучусуча, акциягъа бусагъатда аскерде къуллукъ эте тургъан жашланы аналары да чакъырылгъандыла. Алагъа  саугъаланы   Солдат аналаны комитетини председатели Жанна  Луева  бергенди.

«Солдатны анасыны жюреги» деген акция ёсюп келген тёлюню патриот ниетде юйретиуге  бурулупду. Аны себепли 2016 жылда РФ-ни къоруулау министри Сергей Шойгуну башламчылыгъы бла  «Юнармия» къымылдау къуралгъанды. Бюгюнлюкде аны тизгинлеринде  беш жюзден аслам жаш бла къыз бардыла. Бахсан шахарда да  акцияны кезиуюнде «Юнармияны» сатырларына отуз адам алыннганды. Аланы   Абубакар Костоев бла  Валерий Куков эмда  шахар округну башчысыны  орунбасары Фатима Карданова алгъышлагъандыла.

Жыйылыуну ахырында   аскер эм граждан борчларын тынгылы толтургъан ветеранланы  иги кесегине   грамотала, майдалла, саугъала да  берилгендиле.

Холаланы Марзият
Поделиться: